Бугун, 30 август куни Кўксаройда Мустақилликнинг 31 йиллиги муносабати билан мукофотланган ўзбекистонликларни тақдирлаш маросими бўлиб ўтди. Унда президент Шавкат Мирзиёев иштирок этиб, тақдирланган ўзбекистонликларга ўз мукофотларини топширди.
Маросимда иштирок этган 44-Бутунжаҳон шахмат олимпиадаси ғолиби, «Ўзбекистон ифтихори» фахрий унвони соҳиби Жаҳонгир Воҳидов «Дарё» мухбири билан суҳбатда президентнинг қўлидан мукофотни қабул қилиб олиши, келгусидаги режалари ва ёшларга маслаҳатлари билан ўртоқлашди.
Президентимизнинг қўлларидан мукофотни қабул қилиб олдик, ҳаяжонимиз жуда юқори даражада эди. Биз уларнинг табрикларини эшитиб жуда катта ҳис-ҳаяжонни ҳис қилдик. Эндиги режаларимиз ҳам анчагина юқори. Биз Жаҳон олимпиадаси ҳамда тезкор шахмат тожини Ўзбекистонга олиб келдик. Насиб бўлса, келгусида индивидуал йўналишда классик шахмат тожини Норвегиядан Ўзбекистонга олиб келишга ҳаракат қиламиз.Эслатиб ўтамиз, Ўзбекистон эркаклар терма жамоаси ҳал қилувчи турда Нидерландияга қарши баҳс олиб бориб, 2,5:1,5 ҳисобида ғалаба қозонган эди. Мазкур ғалаба орқали Ўзбекистон эркаклар терма жамоаси олтин медал масаласини ҳал қилган ва ўз тарихида илк бор Олимпиада чемпионига айланганди.Тенгдошларимга ва укаларимизга ўз устиларида кўпроқ ишлашларини маслаҳат бераман. Президентимизнинг бизга яратиб бераётган имкониятлари жуда ҳам чексиз. Ёшлигимда бу даражага етишни орзу қилардим, ҳозир 15—16 ёшли йигитларимиз ҳам Жаҳон ареналарида юқори натижа кўрсатмоқда.
Ота-оналардан ҳам илтимос қилардим, фарзандларини яратилган шароитлардан муносиб равишда фойдаланишга ундашсин, уларни тўгаракларга олиб боришга имкон топишсин.
Жаҳонгир Воҳидов, шахмат бўйича Ўзбекистон миллий терма жамоаси аъзоси
Шахмат бўйича Ўзбекистон аёллар терма жамоаси эса сўнгги турда Коста-Рика устидан ғалаба қозониб (2,5:1,5), олимпиадани 162 жамоа орасида 31-ўринда якунлаганди.
Изоҳ (0)