Россия олтини импортига Ғарб эмбаргоси кучга киргандан сўнг, Хитой мамлакатнинг ушбу қимматбаҳо металлини сотиб олиш ҳажмини кескин оширди. Бу ҳақда «РБК» хабар бермоқда.
Хитой маълумотларига кўра, июль ойида мамлакат 109 миллион долларлик Россия олтинини импорт қилган, бу июнь ойига нисбатан 8,6 баробар кўп.
2022 йил июль ойида Россиядан Хитойга олтин импорти 108,8 миллион долларни ташкил этди – бу июнь ойидагига нисбатан 8,6 баравар (12,7 миллион доллар) ва ўтган йилнинг июль ойига нисбатан (2,2 миллион доллар) 50 баравар кўп.
Июнь ойи охирида G7 давлатлари Россиядан олтин импортини тақиқлашга келишиб олди. АҚШ томонидан Россия олтинининг янги импортига тақиқ июнь ойи охирида дарҳол кучга кирди. Европа Иттифоқи ва Буюк Британия 21 июль куни ушбу эмбаргога қўшилди.
Шунингдек, август ойи бошида ушбу қимматбаҳо металлни қайта ишлаш бўйича энг йирик марказ бўлган Швейцария томонидан Россиядан олтин импортига эмбарго жорий қилинган.
2022 йил февралигача Россия олтин экспорти асосан Буюк Британияга йўналтирилган — ўтган йил давомида 15,2 миллиард доллар ёки барча етказиб беришнинг 84 фоизи.
2021 йилда тахминан 1 миллиард долларлик қимматбаҳо металл тўғридан-тўғри Швейцарияга юборилган.
Бирлашган Араб Амирликлари (БАА), Германия, Италия ва Ҳиндистон ҳар бири 320–340 миллион доллардан Россия олтинини сотиб олган. Хитой 2021 йилда 237 миллион долларлик Россия олтинини импорт қилган.
Муқобил бозорлар
Хитойнинг июль ойидаги статистик маълумотлари биринчи бўлиб Россия олтин етказиб беришни Шарқий бозорларга йўналтирганини кўрсатади.
Мутахассислар Хитой ва Яқин Шарқ мамлакатлари, масалан, Бирлашган Араб Амирликлари Россия олтинининг муқобил бозорига айланиши мумкинлигини тахмин қилмоқда.
Эмбаргога қўшилмаган мамлакатлардан Россия олтинини сотиб олувчиларга нисбатан иккинчи даражали санкциялар қўлланилмади.
Аввалроқ Ўзбекистоннинг олтин-валюта захиралари қарийб 1 млрд долларга камайгани ҳақида хабар берилганди.
Изоҳ (0)