Американинг Виржиния штатидан собиқ сенатор Ричард Блек қанча украиналиклар ҳалок бўлиши Вашингтонни қизиқтирмаслигини, чунки Россия-Украина низоси АҚШ ҳукумати учун футбол матчига тенг бўлиб, унда улар қандай йўл билан бўлса-да ғолиб чиқишни исташини маълум қилди. Бу ҳақда у «РИА Новости»га берган интервьюсида айтиб ўтди.
Блекнинг сўзларига кўра, Россия Украинага бостириб киришни олдиндан режалаштирмагани аниқ-равшан. «Ҳарбий-тактик илм-фан ҳужум қилувчи ва мудофааланувчи қўшинлар ўртасидаги 3:1 нисбатни кўзда тутади — фақат шундай ҳолдагина ҳужум қилувчи томон жанг майдонида ғолиб бўлиш имкониятига эга бўлади. Бироқ махсус операция бошида Россия Қуролли кучларининг шахсий таркиби бу майдонда фақат 160 минг кишини ташкил қилган, Украина эса Донбассга ҳужум қилиш учун 250 минг кишини жалб қилди», — деди у.
Собиқ сенатор эслатишича, 2021 йил декабрида Россия президенти Владимир Путин кенг кўламли уруш бошланишининг олдини олиш учун улкан саъй-ҳаракатларни амалга оширди. НАТО эса Россия томонининг инқирозли вазиятдан чиқиш бўйича таклифларини шунчаки эътиборсиз қолдирди. Натижада Путин Донбассни ва ўз мамлакати чегараларини ҳимоя қилиш учун махсус ҳарбий операция бошлашга мажбур қолди, дея таъкидлади Блек.
Унинг айтишича, Россия украинларни ўзининг славян қардошлари деб ҳисоблагани учун Украина тинч аҳолисига ва ноҳарбий биноларга зарар етказмасликка интилмоқда. «Россия ҳавода тўлиқ устунликка эга бўлиб турибди. Лекин Россия самолётлари Киев марказини, ҳукумат биноларини ва даҳаларни, Украина учун ўта муҳим бўлган энергия ва сув таъминоти инфратузилмасини бомбардимон қилмаяпти. Чунки Россиядагилар низонинг тинч йўл билан ҳал бўлишига ҳалиям умид қилмоқда», — деди Блек.
Республикачи оммалашиб кетган бир видеони ҳам тилга олиб ўтди, унда Украина қишлоқларидан бирида Россия танки тинч фуқаролар оломони қаршисида тўхтагани акс этган. «Вьетнамда Америка танки бундай вазиятда ҳатто огоҳлантириш сифатида ўқ ҳам узиб ўтирмай, оломонни босиб ўтиб кетган бўларди», — деди у.
Ўз гапларига якун ясар экан, Блек Украина Россия билан сулҳ ҳақида қарор қабул қила олмаслигини айтди. Унинг сўзларига кўра, бундай қарорни фақат Оқ уй қабул қилиши мумкин, аммо АҚШ ҳозирча Россия-Украина низоси давом этишини истайди ва «сўнгги украиналик ўлмагунига қадар» тўхтамайди.
Изоҳ (0)