Украина хавфсизлик хизмати Рамзан Қодировни ҳарбий жиноятларда айблади

Украина хавфсизлик хизмати Чеченистон раҳбари Рамзан Қодиров ва унинг ёрдамчиларига ҳарбий жиноятларда айблов қўйилганини маълум қилди, деб ёзмоқда «Meduza».

Украина хавфсизлик хизмати Чеченистон раҳбари Рамзан Қодиров ва унинг қўл остидаги икки ходими — Чеченистон Миллий гвардияси қўшинлари бошлиғи ўринбосари Данил Мартинов ва тактик гуруҳ қўмондони Ҳусайн Межидов ҳақида «ҳарбий жиноятларга оид аниқ далиллар» тўплаганини маълум қилди.

Украина разведка хизмати маълумотларига кўра, 2022 йил февраль март ойларида Қодиров Миллий гвардия чечен бўлинмаларининг алоҳида ҳарбий амалиётларини ишлаб чиқиш ва режалаштиришни шахсан ўзи назорат қилган, буйруқлар берган, уларнинг раҳбарларидан ҳисобот қабул қилган.

Мартинов, маълумотларга кўра, 5 март куни Киев вилоятининг Бородянка шаҳридаги психоневрологик мактаб-интернатни эгаллаб олишга шахсан раҳбарлик қилган, ўшанда 500 га яқин беморлар ва ходимлар гаровга олинган. Межидов февраль ойи охири – март ойининг бошларида Гостомелда 200 га яқин тинч аҳолини қўлга олиш ва гаровда ушлаб туришга буйруқ берган, — дейди махфий хизмат.

Терговчилар Қодировни тажовузкор урушга тайёргарлик кўриш ва уни бошлаш, Украина чегараларини ўзгартириш бўйича ҳаракатларни амалга ошириш, шунингдек, Россиянинг Украинага қарши ҳарбий тажовузини оқлашда гумон қилмоқда. Мартинов ва Межидов урушга оид қонунларни бузганликда, ҳарбий асирларга ёки тинч аҳолига нисбатан шафқатсиз муносабатда бўлганликда айбланмоқда.

Август ойи бошида Рамзан Қодиров Украинага янги кўнгиллилар гуруҳи юборилганини маълум қилган эди.