Нидерландиянинг Гаага шаҳар кенгаши Евроиттифоқнинг Россияга нисбатан санкцияларини вақтинчалик амалга оширмай туришга рухсат сўрамоқчи. Бу ҳақда 25 август куни Reuters агентлиги муниципалитет аъзоси Саския Брюйнснинг шаҳар кенгашига йўлланган мактубига таяниб хабар берган.
Санкциялар Евроиттифоқ давлат органлари 10 октябргача Россия компаниялари билан шартномаларни бузиши кераклигини кўзда тутади. Бу Гаага учун Россиянинг «Газпром» компанияси билан шартнома тўхтатилишини билдиради. Бироқ шаҳар икки марта (июнда ва июлда) умумевропа тендерини эълон қилган бўлса-да, бошқа газ етказиб берувчиларини ҳали топгани йўқ.
Газ етказиб берувчилар билан тўғридан-тўғри музокаралар битимга олиб келади, аммо бу 10 октябрдан олдин юз бермайди, деди Саския Брюйнс. «Биз етказиб бериш хавфсизлигини кафолатлаш ва музокараларни енгиллаштириш учун жорий шартномамиз учун 2023 йил 1 январигача истисно қилинишини сўраб кўрамиз», — дея унинг мактубидан иқтибос келтиради Reuters.
Гаага ўз вақтида тендерлар ўтказиш шартини бажаргани учун, Брюйнс муддатни кечиктиришга рухсат берилишига умид билдирди.
Шу билан бирга, Брюйнс қўшимча қилишича, 1 январь куни кучга кирадиган ҳар қандай янги шартнома «Газпром» билан ҳозирги битимдан қимматроқ бўлади.
Гаага Нидерландиянинг «Газпром» билан энергетика шартномалари бўлган кўплаб муниципалитетларидан бири, аммо у санкциялардан озод этишни талаб қилишини биринчи бўлиб маълум қилди.
Май охирида «Газпром» Нидерландиянинг энг йирик газ трейдери Gasterra’га газ етказиб беришни тўхтатди, у газни, шу жумладан, Евроиттифоқнинг бошқа мамлакатларига ҳам етказиб беради. Бунга Gasterra Россия гази учун рублда тўлашдан бош тортгани сабаб бўлди.
Energievergelijk сервиси маълумотларига кўра, августда Нидерландияда уй хўжаликлари учун газнинг Европадаги энг баланд нархи қайд этилган — бир кубометр учун ўртача 2,76 евро. Бу бир ой аввалги кўрсаткичдан 22 фоизга кўп ва Евроиттифоқ мамлакатларидаги ўртача нархдан икки баравар юқори демакдир.
Изоҳ (0)