25 август куни Россия Мудофаа вазирлиги Чаплино аввалги куни рус қўшинлари томонидан ўққа тутилганини тасдиқлади – зарба гўёки украиналик ҳарбийлар кетаётган эшелонга берилган. Ҳужум оқибатида, Украина расмийларига кўра, 25 киши, жумладан, икки бола ҳалок бўлган. Россия Давлат Думаси кенгаши БМТ ва МАGATEни Украинадан Запорожье атом электр станциясини ўққа тутишни зудлик билан тўхтатишни талаб қилишга чақирди: томонлар станцияга зарба беришда бир-бирини айбламоқда. Ишғол қилинган Херсон ва Запорожье вилоятларининг бир қанча йирик шаҳарларида электр таъминотида узилишлар юз берди. Запорожье АЭСда хавфсизлик тизимлари ишламай қолди. Украинанинг «Энергоатом» компанияси станция тарихида биринчи марта электр тармоғидан тўлиқ ўчирилганини хабар қилди. Владимир Путин Россия қуролли кучлари сонини оширмоқда: 2023 йилнинг январидан бошлаб ҳарбий хизматчилар сони 1 миллион 150 минг кишини ташкил этади. Meduza урушнинг 183-кунига оид асосий фотосуратларни тақдим этади.
Запорожье атом электр станцияси устидан кўтарилган тутун
Запорожье АЭСнинг сунъий йўлдошдан олинган тасвири. Расмда ёнғиндан кўтарилган тутун акс этган. Март ойидан бери станция, бутун шаҳар каби, рус қўшинлари томонидан назорат қилинмоқда. Август ойи бошидан буён станция ҳудуди ўққа тутилаётгани ҳақида хабарлар кўпаймоқда. Россия ва Украина ҳужумлар учун бир-бирини айбламоқда.Фото: Reuters
24 август куни Россия томонидан ўққа тутилган Чаплино станциясидаги поезд. Зарбаларда 25 киши, жумладан, икки бола ҳалок бўлган.Фото: Anadolu
Чаплино станциясига ҳужум оқибатида шикастланган поезд. Тўртта вагон ёниб кетган, улар ичида одамлар бўлган.Фото: AP Photo
Россиянинг ракета ҳужуми оқибатида вайрон қилинган автомобиллар. Владимир Зеленский БМТ Хавфсизлик кенгашига йўллаган видеомурожаатида Чаплинонинг ўққа тутилиши ҳақида гапирди. Россия Мудофаа вазирлиги вакиллари ҳужум нишони ҳарбий поезд бўлганини таъкидлаб, операция муваффақиятли ўтганини маълум қилди.Фото: Anadolu
Чаплинолик киши уйининг вайроналари орасида музлатгич ичида қолган овқатни олиб кетмоқда. Уй бошқа бир қанча турар жой бинолари каби рус қўшинларининг ракета зарбасидан вайрон қилинган.Фото: Reuters
Северодонецкда гуманитар ёрдам тарқатиш жараёни
ЛХР халқ армияси аскари ва унинг ортида гуманитар ёрдамга навбатда турган маҳаллий аҳоли. Мартдан июнгача Северодонецкда жанглар бўлиб ўтди, шаҳарда ҳали ҳам энергия, газ ва сув йўқ. «ТАСС» хабарига кўра, тиббиёт муассасалари вайрон бўлган, Россия ҳарбийлари кўчма касалхона ташкил қилган.Фото: «ТАСС»
Гуманитар ёрдам учун навбат. ЛХР расмийлари Северодонецкдаги турар жой биноларининг ярмидан кўпини қайта тиклаш шарт эмас, деб ҳисобламоқда. Украина оммавий ахборот воситаларининг таъкидлашича, шаҳар кўчалари чиқиндилардан деярли тозаланмаган.Фото: «ТАСС»
Нью-Йорк посёлкасидаги ҳаёт
Нью-Йорк посёлкасидаги «Мен Нью-Йоркни яхши кўраман» деган белги. Посёлка Горловка (ДХР қўшинлари назорати остида) ва Торецкий (Украина Қуролли Кучлари томонидан назорат қилинади) шаҳарлари яқинида, Донецк вилоятининг Баҳмуцкий туманида жойлашган. Россиянинг Украинага бостириб киришидан олдин посёлкада 10 мингга яқин одам яшаган бўлса, ҳозир у Донбассдаги шиддатли жанглар зонасига айланган. Посёлка Украина Қуролли кучлар назорати остида.Фото: Reuters
Посёлканинг 64 ёшли фуқароси Валерий ўчоқда овқат пиширмоқда. Украина Қуролли Кучлари Бош штабининг сўнгги маълумотларига кўра, Нью-Йорк жойлашган Баҳмут йўналишида рус қўшинларининг ҳужуми давом этмоқда — аммо ҳужумлар қайтарилмоқда.Фото: Reuters
Нью-Йорк посёлкасидаги маданий ва тарихий марказнинг деразасидан ички кўринишиФото: Reuters
Ню-ёрклик 86 ёшли Любов Аркадевна черковдан уйига қайтмоқда.Фото: Reuters
Харьков вилоятидаги Украина қўшинлари
Украиналик аскар чодирдан чиқмоқда. 25 август куни россияликлар Харьков вилояти Чугуевский туманидаги Лебяже қишлоғини ўққа тутди – бир киши ҳалок бўлди, деди маҳаллий ҳокимият. Украина Қуролли Кучлари Бош штабининг сўнгги маълумотларига кўра, Россия армияси бошқа қишлоқ — Петровка яқинида муваффақиятсиз ҳужум уюштирган ва йўқотишларга учраб, орқага чекинган.Фото: AFP
Изоҳ (0)