Россия президенти Владимир Путин Россия армиясининг штат сонини ошириш ҳақида фармон имзолади, деб ёзади Meduza.
Ҳужжатга мувофиқ, штат сони 137 минг кишига оширилади. Бу фақар ҳарбий хизматчиларни кўпайтириш ҳисобига амалга оширилади — армиядаги ноҳарбий ходимлар сони ўзгаришсиз қолади.
Ҳарбий хизматчилар сони айнан қай тарзда — қўшимча чақирув эвазигами ёки шартнома асосидаги ҳарбий хизматчиларни кўпайтириш эвазигами — оширилишига ҳужжатда аниқлик киритилмаган.
Шу тариқа, Россия Қуролли кучлари таркиби 2 039 758 кишига етади, шуларнинг 1 150 628 нафарини ҳарбий хизматчилар ташкил қилади.
Фармон 2023 йил 1 январдан кучга киради.
Россия қўшинлари, кузатувчилар ҳисоб-китобларига кўра, Украинадаги уруш шароитларида аскарлар етишмаслигини бошдан кечирмоқда. Сўнгги ойларда бу танқислик кўнгиллиларни ёллаш (шу жумладан, тергов изоляторлари ва колониялардан) орқали тўлдирилмоқда.
Изоҳ (0)