Buyuk Britaniya razvedkasi: Rossiya fevral oyida Ukraina chegarasidagi harbiy kuchlarining uchdan bir qismini yo‘qotgan
Rossiya armiyasi urush boshlanganidan beri Ukraina chegarasiga joylashtirgan quruqlikdagi harbiy kuchlarining uchdan bir qismini yo‘qotgan. Bu haqda Buyuk Britaniya mudofaa vazirligi razvedka ma’lumotlariga tayanib xabar bergan.
“Rossiyaning Donbassga hujum sur’atlari tushib ketgan va belgilangan jadvaldan kechga qolmoqda. Urushning dastlabki kunlarida erishilgan kichik muvaffaqiyatlarga qaramay so‘nggi oyda Rossiya oldinga tomon siljiy olmadi, katta yo‘qotishlarga uchradi. Ayni vaqtda Rossiya fevral oyida chegaralarga joylashtirgan quruqlikdagi harbiy kuchlarining uchdan bir qismini yo‘qotgan”, — deyiladi vazirlikning Twitter’dagi bayonotida.
Vazirlik xabarida Ukrainadagi harbiy harakatlar davomida Rossiyaning qancha askari halok bo‘lgani yoki yaralangani borasida aniq raqamlar keltirib o‘tilmagan.
Buyuk Britaniya mudofaa vazirligi yaqin oylar davomida Rossiya tomonidan Ukrainadagi harbiy harakatlarni yanada jadallashtirish borasida choralar ko‘rilishining ehtimoli kamligini taxmin qilgan.
Favral oyida Buyuk Britaniya razvedakasining Ukrainadagi urushga jalb qilingan Rossiya qo‘shinlari sonini qanday aniqlagani hanuzgacha noma’lum. Yanvarda AQSH va uning ittifoqchilari Rossiyaning Ukraina bilan chegaralardagi qo‘shini 100 ming ekanini bildirgan, 13-fevralda ularning soni 130 ming nafarga yetgani, 20-fevralda esa DXR va LXR harbiylari, jangchilari bilan qo‘shib hisoblaganda 169 – 190 ming nafar askar Ukrainada jang qilayotgani haqida xabarlar tarqalgandi.
Ukrainada urush boshlanganidan beri Rossiya mudofaa vazirligi ikki marta o‘z armiyasidagi yo‘qotishlar haqida rasmiy ma’lumot bergan. 2-mart kuni 498 nafar askar halok bo‘lgani, 1597 nafar harbiy yaralangani, 25-mart kuni esa 1351 kishi o‘lgani, 3825 nafar harbiy xizmatchining yaralangani xabar qilingan.
Ukraina qurolli kuchlari bosh shtabi 15-may holatiga ko‘ra Rossiyaning harbiy yo‘qotishlari 27,4 ming nafar ekanligini bildirgan.Avval Britaniya Mudofaa vazirligi Rossiya qo‘shinlarining Ukrainadagi urushda ko‘rgan yo‘qotishlarini tiklash uchun yillar kerak bo‘lishi haqida bayonot bergandi.
