Киев шаҳар кенгаши, уларнинг фикрича, «Россия ҳамда совет даври» билан боғлиқ бўлган 95 та кўча, тор кўча ва майдонларни қайта номлади, деб ёзади Meduza. Бу ҳақда Киев мери Виталий Кличко маълум қилган.
Мер бир нечта мисолларни келтириб ўтди. Масалан, Маршал Малиновский кўчаси «Азов» Полки Қаҳрамонлари кўчаси, Тула майдони УИА (Украина исёнчилар армияси) Қаҳрамонлари майдони, Питер кўчаси эса Лондон кўчаси деб ўзгартирилган.
«Бу ўз тарихимиз талқинининг ёлғондан манипуляция қилиниши ва унга Россия тажовузкорининг таъсирини камайтириш йўлидаги муҳим қадамдир», — деди у.
Шу куниёқ Одесса маъмурияти шаҳардаги 200 дан ортиқ Россия ёки СССРга алоқадор топонимларни ўзгартиришга тайёрланаётганини маълум қилди.
Украина шаҳарларида Россия билан боғлиқ топонимларни ўзгартириш бўйича кампания бир неча ойлардан буён давом этмоқда. Бир нечта ёдгорликлар, масалан, Александр Пушкинга аталган ҳайкаллар ҳам олиб ташланган.
Москвада Россия Украинага бостириб кирганидан кейин Донецк Халқ Республикаси ва Луганск Халқ Республикаси билан номланувчи майдонлар пайдо бўлди. Россиянинг бошқа шаҳарларида ДХР арбоблари, шу жумладан, айирмачиларнинг марҳум етакчиси Александр Захарчено шарафига номланган топонимлар (жой номлари) пайдо бўла бошлади.
Украинада 2015 йилда нацистлар ва коммунистлар режимларини жазолаш тўғрисида қонун қабул қилингач, совет даврига тааллуқли деб ҳисобланилган кўплаб топонимлар қайта номланганди. Россия элчихонасининг консуллик бўлими жойлашган Панфиловчилар кўчаси Кўнгиллилар батальони кўчаси деб ўзгартирилган эди.
Изоҳ (0)