Германия канцлери Олаф Шольц АҚШ президенти Жо Байденнинг Украинага Россия ҳудуди бўйлаб зарбалар учун қўлланилиши мумкин бўлган қурол-яроғлар етказиб беришни тақиқлашга нисбатан позициясини қўллаб-қувватлашини маълум қилди, деб ёзади «РБК».
Магдебургда нутқ сўзлаш чоғида Шольц Байденнинг ушбу масала бўйича гапларини эслатди ва, унинг фикрича, бошқа мамлакатлар ҳам шу позицияга амал қилиши кераклигини айтди. «Биз ҳеч қачон ёлғиз ҳаракат қилмаймиз, аммо доим иттифоқдошларимиз қилаётган ишлардан мўлжал оламиз», — дея қўшиб қўйди у.
Ғарб қурол-яроғларининг Украина ҳукумати томонидан Россия ҳудудига зарбалар бериш учун қўлланилиши эҳтимоли ҳақидаги баҳс-мунозара баҳорда бошланди. Киев Россия армияси томонидан зарбаларга жавоб қилиш учун бир неча марта Американинг HIMARS ва MLRS баравар ўт очиш реактив тизимларини етказиб беришни сўради. Вашингтон эса Украина Қуролли кучлари улардан Россия ҳудудини ўққа тутиши мумкинлигидан хавфсираб, бундай қуролларни етказиб беришдан бош тортганди.
Охир-оқибат, АҚШ президенти Жо Байден Вашингтон Украинага Россия ҳудудига етиб бора оладиган қурол-яроғларни тақдим этмаслигини маълум қилди. Шунингдек, у АҚШ ёки унинг иттифоқдошлари ҳужумга учрамагунича, мамлакат низога бевосита қатнашмаслигини ҳам айтди.
HIMARS тизимлари барибир Украинага жўнатилди, бироқ АҚШ улар билан бирга тақдим этган снарядлар Россия ҳудудига хавф туғдирмайдиган узоқликка учади.
Россия ташқи ишлар вазири Сергей Лавров АҚШнинг позициясини оқилона деб ҳисоблади. Россия Хавфсизлик кенгаши раиси ўринбосари Дмитрий Медведев Россия шаҳарларига ҳужум қилинган тақдирда, ҳарбийлар «ушбу жиноий қарорларни қабул қилган марказлар»га зарбалар беришини даъво қилганди.
Изоҳ (0)