Niderlandiyaning Gaaga shahar kengashi Yevroittifoqning Rossiyaga nisbatan sanksiyalarini vaqtinchalik amalga oshirmay turishga ruxsat so‘ramoqchi. Bu haqda 25-avgust kuni Reuters agentligi munitsipalitet a’zosi Saskiya Bryuynsning shahar kengashiga yo‘llangan maktubiga tayanib xabar bergan.
Sanksiyalar Yevroittifoq davlat organlari 10-oktabrgacha Rossiya kompaniyalari bilan shartnomalarni buzishi kerakligini ko‘zda tutadi. Bu Gaaga uchun Rossiyaning “Gazprom” kompaniyasi bilan shartnoma to‘xtatilishini bildiradi. Biroq shahar ikki marta (iyunda va iyulda) umumyevropa tenderini e’lon qilgan bo‘lsa-da, boshqa gaz yetkazib beruvchilarini hali topgani yo‘q.
Gaz yetkazib beruvchilar bilan to‘g‘ridan to‘g‘ri muzokaralar bitimga olib keladi, ammo bu 10-oktabrdan oldin yuz bermaydi, dedi Saskiya Bryuyns. “Biz yetkazib berish xavfsizligini kafolatlash va muzokaralarni yengillashtirish uchun joriy shartnomamiz uchun 2023-yil 1-yanvarigacha istisno qilinishini so‘rab ko‘ramiz”, — deya uning maktubidan iqtibos keltiradi Reuters.
Gaaga o‘z vaqtida tenderlar o‘tkazish shartini bajargani uchun, Bryuyns muddatni kechiktirishga ruxsat berilishiga umid bildirdi.
Shu bilan birga, Bryuyns qo‘shimcha qilishicha, 1-yanvar kuni kuchga kiradigan har qanday yangi shartnoma “Gazprom” bilan hozirgi bitimdan qimmatroq bo‘ladi.
Gaaga Niderlandiyaning “Gazprom” bilan energetika shartnomalari bo‘lgan ko‘plab munitsipalitetlaridan biri, ammo u sanksiyalardan ozod etishni talab qilishini birinchi bo‘lib ma’lum qildi.
May oxirida “Gazprom” Niderlandiyaning eng yirik gaz treyderi Gasterra’ga gaz yetkazib berishni to‘xtatdi, u gazni, shu jumladan, Yevroittifoqning boshqa mamlakatlariga ham yetkazib beradi. Bunga Gasterra Rossiya gazi uchun rublda to‘lashdan bosh tortgani sabab bo‘ldi.
Energievergelijk servisi ma’lumotlariga ko‘ra, avgustda Niderlandiyada uy xo‘jaliklari uchun gazning Yevropadagi eng baland narxi qayd etilgan — bir kubometr uchun o‘rtacha 2,76 yevro. Bu bir oy avvalgi ko‘rsatkichdan 22 foizga ko‘p va Yevroittifoq mamlakatlaridagi o‘rtacha narxdan ikki baravar yuqori demakdir.
Izoh (0)