Ўзбекистоннинг бир қатор вилоятларида соғломлаштириш акциялари ўтказган 150 нафардан иборат махсус бу гуруҳ Тошкент шаҳрида навбатдаги сайёр қабул ва тиббий кўрикни ўтказади. Бу ҳақда Соғлиқни сақлаш вазирлиги матбуот хизмати хабар қилди.
Қайд этилишича, пойтахтда яшаётган 2 миллион 860 мингдан зиёд аҳолига бугунги кунда 211 та тиббиёт муассасаси хизмат кўрсатади. Шундан 167 тасини Тошкент шаҳар Соғлиқни сақлаш бош бошқармаси тасарруфидаги, қолган 44 тасини эса республика ихтисослаштирилган марказлари ва клиник шифохоналари ташкил этади.
Тошкентда ташкил этилаётган соғломлаштириш акцияси давомида дастлаб шаҳар аҳолиси чуқурлаштирилган тиббий кўрикдан ўтказилади. Қолаверса, уларда аниқланган касалликлар бўйича туманлар кесимида беморлар рўйхатини шакллантириш режалаштирилган.
Мамлакатнинг етакчи шифокорлари аҳоли билан учрашиб, «хонадонбай» тамойили асосида кўп тарқалган касалликлар балансини яратишга кўмаклашади. Фуқаролар ўртасида тиббий тарғибот тадбирлари ўтказилади. Қолаверса, бирламчи тиббий-санитария муассасалари фаолиятини яхшилаш, аҳолининг соҳага доир муаммоларига ижобий ечим топиш ҳам кўзда тутилган.
Шунингдек, акция доирасида пойтахтнинг қатор туманларида сайёр қабуллар, тиббий кўриклар ташкил этиш режалаштирилган.
«Соғлиқни сақлаш вазирлиги томонидан ўтказилаётган соғломлаштириш акциялари, юртимизда яшовчи беморлар ҳузурига энг малакали шифокорлар, етакчи тиббиёт олимларининг ўзлари кириб бораётгани сифатли тиббий хизматни «маҳаллагача тушириш», уни одамларга янада яқинлаштиришга хизмат қиляпти», — дейилади хабарда.
Изоҳ (0)