Зеленский Қримни «ҳар қандай воситалар ёрдамида» қайтариб олишга ваъда берди

Украина Қримни «ўзи тўғри деб билган ҳар қандай воситалар ёрдамида» қайтариб олади, деди Владимир Зеленский «Қрим платформаси» онлайн-саммити чоғида.

«Қримни озод қилиш зарур. Бу дунё ҳуқуқий тартибининг қайта тикланиши бўлади. Биз бошқа мамлакатлар билан маслаҳатлашмаган ҳолда, Қримни ўзимиз тўғри деб билган ҳар қандай воситалар ёрдамида қайтариб оламиз», — деди Зеленский.

Бош вазир Денис Шмигаль ҳам саммитда нутқ сўзлар экан, Киев Қримда «қуролсизлантириш ўтказиш»га тайёрлигини маълум қилди. Унинг аниқлик киритишича, ярим орол ҳудудида туриб, Украина ҳудуди ўққа тутилмоқда, бу эса у ердаги Россия ҳарбий инфратузилмасини «қонуний жанговар нишон»га айлантирмоқда.

«Шунинг учун Украина Қримни қуролсизлантиришга ва бизнинг давлатимизга нисбатан ҳам, бутун Европага нисбатан ҳам бу хавфларни баратараф этишга тайёр. Айни вақтда биз Россиянинг ўз ихтиёри билан Қрим ҳудудидан ўз қўшинлари ва ҳарбий техникасини олиб кетишини олқишлаган бўлардик», — дея қўшиб қўйди бош вазир.

Аввалроқ Туркия президенти Ражаб Тоййиб Эрдўғон Киевдаги «Қрим платформаси» онлайн-саммити иштирокчиларига йўналтирилган видеомурожаатида Қрим ярим ороли Украинага қайтарилиши зарурлигини маълум қилгани хабар берилганди. «Халқаро ҳуқуққа мувофиқ, Қрим Украинага қайтарилиши керак, у Украинанинг ажралмас қисмидир», — деди Туркия раҳбари.

Москва 2014 йилги референдумдан кейин Қримнинг кимга тегишлилиги масаласи муҳокама қилинмаслигини бир неча марта айтиб ўтган. «Қрим халқи қарор қабул қилди ва овоз берди. Масала тарихий жиҳатдан ёпилди», — деган эди Путин 2016 йилда. Россия ташқи ишлар вазири ўринбосари Андрей Руденко 2019 йилда Россия Қримнинг тегишлилик масаласини ҳеч қанақа майдонда муҳокама қилмаслигини айтганди.