Туркия президенти Қрим Украинага қайтарилиши кераклигини айтди

Туркия президенти Ражаб Тоййиб Эрдўғон Киевдаги «Қрим платформаси» онлайн-саммити иштирокчиларига йўналтирилган видеомурожаатида Қрим ярим ороли Украинага қайтарилиши зарурлигини маълум қилди, деб ёзади Anadolu Agency.

«Халқаро ҳуқуққа мувофиқ, Қрим Украинага қайтарилиши керак, у Украинанинг ажралмас қисмидир», — деди Туркия раҳбари.

Унинг сўзларига кўра, бу ҳам минтақавий, ҳам глобал хавфсизлик ва барқарорлик учун ҳамда Украина ҳудудий яхлитлигини сақлаш учун ўта муҳимдир.

Эрдўғон Туркия Қримнинг босиб олинишини тан олмаслигини эслатди. У бу қадамни ноқонуний деб ҳисоблайди ва бу ҳақда воқеалар юз берган биринчи кундан бошлаб гапириб келади.

Давлат раҳбари Туркиянинг бирламчи вазифаларидан бири сифатида Қрим татарлари орасидаги ватандошлари ҳуқуқ ва хавфсизлигини ҳимоя қилиш эканини айтди. У Анқара ушбу масалада Украина ҳукуматини ва Қрим татарларини қўллаб-қувватлашда давом этишига ишонтирди.

Эрдўғон Украинадаги уруш мавзусига тўхталар экан, Туркия Украина ҳудудий яхлитлиги ва суверенитети асосига қурилган адолатли тинчлик тарафдори эканини таъкидлади.

Айни пайтда Эрдўғон Россия ва Украина президентлари Владимир Путин ва Владимир Зеленский ўртасида музокараларни ташкиллаштирмоқчи.

Август бошида Эрдўғон ва Путин Сочида музокаралар ўтказган эди. CNN Turk маълумотларига кўра, ушбу учрашув давомида Россия президенти Зеленский билан музокаралар эҳтимоли борлигига «ишора қилган».

18 август куни Львовда Украина ва Туркия президентлари ҳамда БМТ бош котиби иштирокида уч томонлама саммит бўлиб ўтди. Унинг якунида Зеленский агар Россия қўшинлари Украинани тарк этсагина РФ билан музокаралар амалга ошиши мумкинлигини таъкидлади. Ўз навбатида Эрдўғон уч томонлама учрашув натижаларини Путин билан муҳокама қилишини билдирди.