ОПЕК+ иттифоқи яқин келажакда нефть қазиб олишни қисқартириш ниятида эмас. Лекин Эрон нефти жаҳон бозорига қайтса, бундай қарор қабул қилиниши эҳтимоли бор. Бу ҳақда Reuters хабар берди.
Агентликнинг қайд этишича, агар Эрон ва Ғарб ядровий битим тузса, Эрон нефти жаҳон бозорига қайтиши мумкин.
Бир кун аввал, 23 августда ОПЕК+ агар санкциялар остида қолган Эрон нефти яна жаҳон бозорида сотилса, нефть қазиб олишни қисқартиришга тайёр эканлигини билдирган эди.
Шундан сўнг, ОПЕК+ нефть бозорида ишлаб чиқаришни қисқартириши мумкинлиги ҳақидаги хавотир сабаб хом ашё нархи ўртача даражада ошиб бормоқда.
Охирги ҳафталарда нефть нархи Хитойнинг иқтисодий секинлашуви ва Ғарбдаги рецессия хавотирлари туфайли бир баррель учун 120 доллардан 95 долларгача тушиб кетганди.
ОПЕК+ келишувига киритилган йирик нефть ишлаб чиқарувчилари қувват етишмаслиги сабабли сентябрь ойида ишлаб чиқаришни атиги 100 минг баррелга оширишга муваффақ бўлган.
Келишув шартларига кўра, Россия ишлаб чиқаришни кунига 11 миллион баррелгача ошириши керак, бироқ санкциялар туфайли экспорт билан боғлиқ муаммоларни ҳисобга олсак, бу даражага эришиш ниҳоятда қийин бўлади.
Аввалроқ Туркия Россиядан нефть импортини икки баравар оширгани ҳақида хабар берилганди.
Изоҳ (0)