Европа Иттифоқи Украинага қўшни давлатларнинг бирида украиналик аскарларни тайёрлаш маркази ташкил этишни режалаштирмоқда, деди Европа Иттифоқининг ташқи ишлар ва хавфсизлик сиёсати бўйича олий вакили Хосеп Боррел. Бу ҳақда «Forbes.ru» нашри хабар бермоқда.
Бу муҳим миссия бўлади. Ҳар қандай миссия можаро даражасида бўлиши керак. Ва бу кичик уруш эмас, — дейди у.Боррелнинг қайд этишича, янги миссия Украина ҳудудида эмас, балки қўшни давлатлардан бирига жойлаштирилади. У бу таклиф 29 август куни Прагада бўлиб ўтадиган Европа Иттифоқи мудофаа вазирларининг норасмий йиғилишида маъқулланишига умид билдирди.
Бироқ миссия иштирокчиларининг эҳтимолий сони ва бошқа тафсилотлар ошкор қилинмаган.
Европа Иттифоқи олий комиссари Европа Иттифоқи ичида ҳам, ташқарисида ҳам кўп сонли давлатлар Украинага ҳарбий техника етказиб бераётганини ва икки томонлама ушбу материалдан фойдаланиш учун зарур бўлган ўқув машғулотларини тақдим этаётганини тан олди.
Унинг таъкидлашича, Россиянинг Украинадаги давом этаётган махсус ҳарбий операциясига қарши туриш нафақат қурол-яроғ етказиб бериш, балки қуролли кучларни тайёрлаш ва ташкил этишда ҳам ёрдам беришни талаб қилади.
Аввалроқ Боррел Европа Украинага «иложи борича» ёрдам бериши, лекин Россия билан зиддиятни авж олдиришдан қочиши кераклигини айтганди.
Биз Россия билан урушдан қочишимиз керак, чунки акс ҳолда бу учинчи жаҳон уруши бўлади, — деган у.
Изоҳ (0)