Расман: Сервер Жепаров — «Локомотив» бош мураббийи

Сервер Жепаров «Локомотив» бош мураббийига айланди, дея хабар беради «темир йўлчилар» матбуот хизмати.

Раҳбарият қарорига кўра 2008 ва 2010 йилда Осиёнинг икки карра «Энг яхши футболчиси» деб топилган Сервер Жепаров «Локомотив» жамоаси бош мураббийи этиб тайинланди.

Маълумот учун, Жепаров бунгача клуб спорт директори вазифасини бажариб келаётганди. Унга мураббийлар штабида Мирко Еличич яқиндан ёрдам беради.

Аввалроқ, Тошкент жамоаси ярим йил давомида жамоани бошқариб келган Денис Коростиченко истеъфога чиқаргани хабар қилинганди.

Эслатиб ўтамиз, Жепаров 2016 йилда футболчи сифатида «темир йўлчилар» сафида ўйнаган.

Маълумот учун Сервер футболчилик фаолияти давомида Ўзбекистоннинг «Навбаҳор», «Пахтакор», «Бунёдкор», «Локомотив», «Металлург», Жанубий Кореянинг «Сеул», «Сеонгнам», «Улсан», Саудия Арабистонининг «Аш-Шабаб», Эрон чемпионатининг «Истиқлол», «Сепахон» ва Қозоғистоннинг «Жетису» клубларида тўп сурган.