«Қалпоқ»даги Мараймамат — Раҳмонали Суропов тез ёрдамнинг нотўғри ташхиси сабаб инфаркт бўлгани, шундан сўнг қанд касалини орттириб олганини маълум қилди (видео)

«Қалпоқ»даги Мараймамат — актёр Раҳмонали Суропов «Дарё» интернет-нашрига эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Суҳбат давомида актёр Раҳмонали Суропов тез ёрдамнинг нотоғри ташхиси сабаб инфаркт бўлгани, инфарктдан сўнг қанд касалини орттириб олгани ҳақида гапириб берди.

Инфаркт сабаби пала-партиш овқатланишдан, маишатни кўпайтириб юборишдан, бошқа ҳеч нарса эмас. Бошимдан ўтганини ўзим биламан. Спорт билан шуғулланмаслик ёки меҳнат қилмасликдан келиб чиқди.

Мени ўша куни тушлик пайти бир укамиз меҳмон қилди. Бешбармоқ едик. Бешбармоқ бир одамга кўп сузилган экан, қазилари билан. Кечқурун Тўйтепага зиёфатга бордим. Чойхонада қозонкабоб қилишган экан.

Кечқурун уйга келдим, кўкрак қафасим қаттиқ оғриди. Инфаркт бўлган эканман. Жуда ҳам қаттиқ оғриқ пайдо бўлди. Хотинимга билдирмадим-да, залга чиқиб ётдим. Оғриқ жуда ҳам кучайиб борарди. Кейин хотиним чиқиб келди.

«Тез ёрдам чақирайликми?» деди. Мен йўқ дедим. У барибир чақирди. Тез ёрдам келиб, «ошқозонингиз касал экан-ку», деди. Кейин ошқозон оғриғига қарши укол қилди. У эса мумкин эмас экан.

Эрталаб ўзим шифохонага бордим. «Сизни ким олиб келди?» дейишди. «Ўзим келдим», дедим. «Ие, қанақа одамсиз? Инфаркт бўлганингизни биласизми?» дейишди. Тез ёрдам чақирмоқчи бўлишди. Нима қилиш кераклигини сўрадим. «Ётиш керак, қимирлашингиз мумкин эмас», дейишди.

Кейин ўзим машинага миниб, 16-шаҳар шифохонасига бордим. У ерда ҳам «ким олиб келди?», дея савол беришди. Ўзим келганимни айтдим. Аравачага ётқизиб, реанимацияга олиб кириб кетишди. Реанимацияда 3 кун ётдим. Кейин стенд қўйишди.

Ҳозир аҳволим яхши, лекин барибир кўп ўйлайверганимдан оддий шамоллаш бўлса ҳам, юрагим оғридими, деб қўрқиб қолганман. Лекин қон суюлтирадиган дорини ҳар доим ичиб тураман. Оз-моз спорт билан шуғуллангандек бўламан. Ҳаёт ўтиб турибди, алҳамдулиллаҳ.

Энди ҳамма нарса бўйнимда бўлгани учун, «мен ҳам хоҳлайман, кимдир кўрсатув қилса-да, ўшанда фақат ролимни ўйнаб, қайси ролни бўлса ҳам, ўйнаб, кетсам», лекин унақа бўлмайди. Сценарийдан бошлаб съёмка тугагунга қадар, монтаж бўлиб, кўрсатув тайёр ҳолга келгунга қадар бўйнимда масъулият туради.

Бу ерда тортишувлар бўлади, сиқилишлар бўлади. Айтилган пайтда актёр-актрисамиз келмай қолади. Унга сиқиласиз.

Юракка стенд қўйганимдан кейин у нарсаларнинг ҳаммасини унутдим. Келмаса-келмас, «Худонинг айтгани бўлади», дея сиқилмай қўйдим.

Стенд қўйганимдан кейин, қанд касаллигини ушлаб олибман. «Диета қилиб юринг» дейишяпти, мен диета қилолмайман. Қилсам бўлади, лекин қилолмайман. Дорисини бир-бир ичиб тураман. Кўп эсимдан чиқиб қолади.

Мен қанд касали бўлмайман, деб ўйлагандим, юрак касали ҳам бўлмайман, деб ўйлаб юрардим. Худонинг айтгани бўларкан. Аллоҳнинг ўзи асраб юрсин.

Раҳмонали Суропов, актёр, «Қалпоқ» ҳажвий кўрсатуви асосчиси