Samarqandda 2022-yilning yanvar—iyun oylarida 148 ta qonunchilikka muvofiq bo‘lmagan qarorlar qabul qilinganligi aniqlangan. Bu ko‘rsatgich 2021-yilga qaraganda (340 ta) 1,2 baravarga kamaygan. Bu haqda Xalq deputatlari Samarqand viloyat Kengashining yetmishinchi sessiyasida viloyat Adliya boshqarmasi boshlig‘i Salohiddin Nuriyev ma’lum qildi, deya xabar berdi “Daryo” muxbiri.
Salohiddin Nuriyevning ta’kidlanishicha, prezidentning 2021-yil 8-iyundagi “Yer munosabatlarida tenglik va shaffoflikni ta’minlash, yerga bo‘lgan huquqlarni ishonchli himoya qilish va ularni bozor aktiviga aylantirish chora-tadbirlari to‘g‘risida”gi farmoniga muvofiq 2021-yil 1-avgustdan boshlab tuman va shahar mahalliy davlat hokimiyati organlari tomonidan yer uchastkalariga bo‘lgan huquqlarni belgilash, e’tirof etish, o‘zgartirish, bekor qilish vakolatlari bekor qilingan, Biroq Kattaqo‘rg‘on tuman hokimligi tomonidan Iska qishlog‘ida yashovchi fuqaro I.Fayziyevaning yer uchastkasiga va bino inshootiga nisbatan egalik huquqini bekor qilish yuzasidan qaror qabul qilingan.
Shuningdek, Samarqand shahar hokimligi tomonidan 2 ta, Past Darg‘om tuman hokimligi tomonidan 10 ta holatda noqonuniy qarorlar qabul qilingan. Mazkur holatlar yuzasidan viloyat hokimi nomiga xat kiritilib, noqonuniy qabul qilingan qarorlar bekor qilingan.
Farmoyishlarni tizimga joylashtirishda oddiy muddatlarga rioya etilmasligi ularning qonunchilikka zid bo‘lishiga sabab bo‘layotgani aniqlangan.
Masalan, Qo‘shrabot tuman hokimining 2022-yil 30-iyundagi farmoyishi bilan xodim A.Shirinboyevga 2022-yil 24-iyundan, ya’ni 6 kun oldingi sana bilan mehnat ta’tili berilgan.
Salohiddin Nuriyevning ma’lum qilishicha, “E-qaror” elektron tizimi orqali viloyat hamda tuman (shahar) hokimliklari tomonidan bugungi kunga qadar jami 15505 ta qaror va farmoyishlar qabul qilingan. Shundan 7692 ta hokim qarorlari, 3465 ta hokim farmoyishi hamda 4348 ta Kengash qarorlari hisoblanadi.
Izoh (0)