«Бизнес миқёсига қараб табақалаштирилган ёндашувларнинг эълон қилиниши жуда муҳим қадам бўлди» – иқтисодчи Отабек Бакиров президент билан тадбиркорлар мулоқоти ҳақида

Иқтисодчи Отабек Бакиров Telegram’даги каналида президент Шавкат Мирзиёевнинг тадбиркорлар билан мулоқотида янграган янгиликларга муносабат билдирди.

Иқтисодчининг ёзишича, кичик тадбиркорлар фойда солиғини икки баробар кам тўлаши уларга катта енгиллик беради.

«2023 йилнинг 1 январидан бошлаб кичик бизнес вакилларининг фойда солиғи икки баробарга камаяди. Бу имтиёз 370 минг кичик тадбиркорга енгилликлар яратади ва уларга жуда катта стимул беради. Қайд этиш керакки, айрим тадбиркорлар солиқ юкидан қочиб, даромадларини яширади ва турли йўллар билан ўзини микро бизнес вакили қилиб кўрсатишга уринади. Ушбу янгилик микро бизнесдан кичик бизнесга ўтган тадбиркорларга ўз ўрнини топишда катта ёрдам беради.

Маълумот учун, кичик бизнес тоифасига йиллик айланмаси 1 миллиард сўмдан 10 миллиард сўмгача бўлган бизнесменлар киради», – дея қайд этган мутахассис.

Давлат раҳбарининг тадбиркорлар билан учрашуви олдидан тармоқда ташвиқот ва маъмуриятга яқин каналлар томонидан учрашувда «бомба янгиликлар» бўлиши ҳақида қатор сиздиргилар янгради. Тўғриси, жуда кўп фойдаланувчилар, хусусан, мен ҳам ортиқ даражада умидларга берилдик.

Масалан, индивидуал солиқ имтиёзлари ва преференцияларнинг буткул бекор қилиниши ва барча учун тенг имкониятлар даври бошланиши эълон қилинишини кутдим мен. Чунки соғлом рақобат муҳитини бузаётган ҳам, солиқ юкини ошираётган ҳам, бюджет дифицитини шунча уринишларга қарамай камайтиришга имкон бермаётган ҳам аслида ўша ярамас имтиёзлар бўлиб қолмоқда.

Яна бир умид протексионизм сиёсатидан воз кечилишини айтилиши билан боғлиқ эди. Иқтисодий ўсиш, фаровонликни ошишини секинлаштираётган, бизнесни глобал тақсимот ва нисбий афзалликлар имкониятларидан маҳрум қилаётган протексионизм зиёнлари борасида ё савол айтилади ёки янги тезислар очиқланади, деган орзу-ҳаёллар йўқ эмасди.

Бизнес ривожи учун давлатнинг ихчамлаштириш масаласи жуда муҳим. Ўзбекистонда давлатнинг иқтисодиётга аралашуви ҳаддан зиёд. Бюджет-солиқда ҳам, бизнесда улуши мавжудлигида ҳам ва регуляцияда ҳам. Афсуски, давлат ҳам катта ўйинчи, ҳам катта ҳакам, ҳам катта тақсимловчи. Шу мавзу ҳам кўтарилиши ва сигналлар керак эди, назаримда.

Лекин бизнес миқёсига қараб табақалаштирилган ёндашувларнинг эълон қилиниши жуда муҳим қадам бўлди. Албатта, ҳали тўлиқ тафсилотларини билиш учун механизмлар очиқланиши керак. Нима бўлганда ҳам бизнеснинг босқичма-босқич ўсиши, ўсишдан тўхтаб қолмаслиги учун бу қадамлар катта рағбат бўлиши аниқ. Чунки энди ўсиш жазоланмайди, мукофотланади.

Отабек Бакиров, иқтисодчи.