Сирдарё вилоятининг Оқолтин туманида Isuzu автобуси газ баллони портлашидан 6 киши ҳалок бўлиб, 15 киши тан жароҳати олганди. «Ўзавтосаноат» матбуот хизмати ҳолат юзасидан ўрганиш натижаларини эълон қилди.
Қайд этилишича, «Ўзавтосаноат» АЖ тизимидаги Комплаэнс хизмати ходимлари ҳамда «Самарқанд автомобиль заводи» МЧЖ ҚК масъул ходимлари зудлик билан жойига бориб ўрганганда, 18 август куни 14:30 ларда Сирдарё вилояти Оқ Олтин туманида жойлашган, «Нур Транс Гас» МЧЖ газ тўлдириш шаҳобчаси ҳудудида Isuzu SAZ NP21 русумли автобуснинг уст қисмига ўрнатилган газ баллонларидан бири портлагани аниқланган.
Мазкур автобус дизель ёқилғисида ҳаракатланишга мослашган ҳолда 2012 йилда «Самарқанд автомобиль заводи» МЧЖ ҚКда ишлаб чиқарилиб, МЧЖнинг Хоразм вилоятидаги расмий диллери орқали сотилган.
Кейинчалик автобусни сотиб олган корхона томонидан 2014 йилда 60 литр сиғимли, 6 дона газ балонлар автобус конструкциясига ўзгартириш киритилган ҳолда автобуснинг уст қисмига ўрнатилган.
Бундан ташқари, ушбу автобус бир йиллик кафолат даврида кафолат талаблари бўйича белгиланган даврий кўрикдан ўтказиш масаласида расмий дилерга мурожаат қилмаган.
«Таъкидлаш керакки, кафолатли хизмат кўрсатиш соҳаси сиёсатига кўра, автобус конструкциясига ўзгартириш киритилган ҳолларда, берилган кафолат доирасидан ўз-ўзидан чиқиб кетади. Юқоридаги ҳолат ҳуқуқни муҳофаза қилувчи органлар томонидан ўрганилмоқда», — дейилади «Ўзавтосаноат» хабарида.
Эслатиб ўтамиз, ҳолат юзасидан Жиноят кодексининг 262-моддаси (транспортни таъмирлаш ёки уни фойдаланишга чиқариш қоидаларини бузиш) 3-қисми «а» банди билан жиноят иши қўзғатилган.
Изоҳ (0)