Руминия элчиси Даниэль Кристиан Чобану Қашқадарё вилоятидаги Ҳазрати Султон чўққисига (4083 метр) кўтарилиб, у ердан Ўзбекистон халқига видеомурожаат йўллади, деб хабар бермоқда «Дунё» ахборот агентлиги.
Дипломат ўзининг чўққига кўтарилишини Руминия дипломатиясининг 160 йиллиги (27 июль — Руминияда Ташқи ишлар вазирлиги ташкил этилган кун), шунингдек, Ўзбекистон мустақиллигининг 31 йиллигини нишонлаш билан боғлади. У ерда Руминия элчиси Ўзбекистон халқини яқинлашиб келаётган Мустақиллик куни муносабати билан табриклаб, ўзбек тилида қисқа видеолавҳа суратга олди.
Даниэль Кристиан Ўзбекистонда Ҳазрати Султон чўққисига муваффақиятли чиққан биринчи хорижий дипломатдир. 2021 йилда мамлакат мустақиллигининг 30 йиллигини нишонлаш арафасида Руминия элчиси Катта Чимён чўққисига (3309 метр) кўтарилганди.
Элчихона маълумотларига кўра, Руминия Ўзбекистон билан муносабатларни ҳар томонлама ривожлантиришдан манфаатдор. Сиёсий, дипломатик, савдо-иқтисодий, маданий ва таълим соҳаларида ҳамкорликни мустаҳкамлаш Руминиянинг Марказий Осиёдаги устувор манфаатларидан биридир.
Таъкидланишича, Ўзбекистонда амалга оширилаётган ислоҳотлар икки давлат ўртасидаги мулоқот ва алоқаларни кенгайтириш учун имконият яратмоқда. Руминия Европа Иттифоқи ва Ўзбекистон ўртасидаги ҳамкорликни мустаҳкамлашни бундан кейин ҳам қўллаб-қувватлаши таъкидланди.
Изоҳ (0)