Ruminiya elchisi Daniel Kristian Chobanu Qashqadaryo viloyatidagi Hazrati Sulton cho‘qqisiga (4083 metr) ko‘tarilib, u yerdan O‘zbekiston xalqiga videomurojaat yo‘lladi, deb xabar bermoqda “Dunyo” axborot agentligi.
Diplomat o‘zining cho‘qqiga ko‘tarilishini Ruminiya diplomatiyasining 160 yilligi (27-iyul — Ruminiyada Tashqi ishlar vazirligi tashkil etilgan kun), shuningdek, O‘zbekiston mustaqilligining 31 yilligini nishonlash bilan bog‘ladi. U yerda Ruminiya elchisi O‘zbekiston xalqini yaqinlashib kelayotgan Mustaqillik kuni munosabati bilan tabriklab, o‘zbek tilida qisqa videolavha suratga oldi.
Daniel Kristian O‘zbekistonda Hazrati Sulton cho‘qqisiga muvaffaqiyatli chiqqan birinchi xorijiy diplomatdir. 2021-yilda mamlakat mustaqilligining 30 yilligini nishonlash arafasida Ruminiya elchisi Katta Chimyon cho‘qqisiga (3309 metr) ko‘tarilgandi.
Elchixona ma’lumotlariga ko‘ra, Ruminiya O‘zbekiston bilan munosabatlarni har tomonlama rivojlantirishdan manfaatdor. Siyosiy, diplomatik, savdo-iqtisodiy, madaniy va ta’lim sohalarida hamkorlikni mustahkamlash Ruminiyaning Markaziy Osiyodagi ustuvor manfaatlaridan biridir.
Ta’kidlanishicha, O‘zbekistonda amalga oshirilayotgan islohotlar ikki davlat o‘rtasidagi muloqot va aloqalarni kengaytirish uchun imkoniyat yaratmoqda. Ruminiya Yevropa Ittifoqi va O‘zbekiston o‘rtasidagi hamkorlikni mustahkamlashni bundan keyin ham qo‘llab-quvvatlashi ta’kidlandi.
Izoh (0)