Ижтимоий тармоқларда машҳурликка эришган блогерлар орасида турли хил йўналишда вайн олиши билан бирга ўзини хонандаликда ҳам синаб кўраётганлари ҳам бор. Ҳаттоки уларнинг айримлари бир нечта клип ва тароналарини мухлисларига намойиш этишга улгурди.
Dili.me
Instagram саҳифасида икки ярим миллиондан ортиқ обуначига эга бўлган инстаблогер, тиктокер Dili.me илк бор тўйида «Онажон» номли таронасини куйлаган. Ушбу тарона YouTube’га қўйилганидан кейин бир миллионга яқин кўришлар сонини забт этди. Унинг «Онажон» номли таронасига видеоклип ишланмаган. Инстаблогер яқинда «Жигарлар» номли таронасига суратга олинган клипни мухлисларига намойиш қилди. Бу клип эса ҳозирга қадар 700 000 дан ортиқ кўрилган. Вайнер тўй хизматларида ҳам иштирок этиб кўп ҳолларда «Онажон» номли таронасини ижро этади.
Озод Хуррамов
Liil Xurramov тахаллуси билан ижод қилувчи, Instagram саҳифасида энг кўп, яъни икки миллиондан ортиқ обуначига эга бўлган вайнер, блогер Озод Хуррамовнинг Ўзбекистон халқ артисти Озода Нурсаидова билан дуэт куйлаши шоу-шувларга сабаб бўлди. «Миллион» номли таронага ишланган клип YouTube’да саккиз ярим миллиондан ортиқ кўрилган. Шундан кейин Озод Хуррамов саҳифасида ўзини оддий ҳаваскор сифатида хонандаликда синаб кўрмоқчилигини айтган. Инстаблогер устози актёр Алишер Узоқовнинг «Наҳотки», «Ошиқ юрак» номли тароналарини cover талқинида куйлади. «Ошиқ юрак» таронасига суратга олинган клип YouTube’да бир ярим миллионга яқин кўришлар сонига эга.
Азода
Асли қозоғистонлик бўлган, Ўзбекистонда ижод қилаётган инстаблогер, тиктокер Азода Юсупахметнинг Instagram саҳифасида бир ярим миллиондан ортиқ обуначи бор. У илк таронасини онасига бағишлаганини, мусиқага ишланган «Она сизни бахтли қиламан» клипи воқеалари ўз ҳаётидан олинганини маълум қилган.
«Болалигимда дадам билан онам оилавий келишмовчилик сабаб ажрашиб кетишган. Учта болани ёлғиз тарбиялаш ва боқиш онамга осон кечмаган. Дадам эса янги оила қуриб, ўзи билан ўзи овора бўлиб кетган. 2012 йил оиламиз учун ниҳоятда оғир келган. Онамни гап-сўзлар, тазйиқлар эзиб қўйган. Ўшанда онамни ҳеч ким эшитмаган.Онамнинг қийналаётганини кўриб, 12 ёшимдан унга ёрдамлашишга ҳаракат қилганман. Бош фарзанд барибир ота-онага кўмакдош бўларкан. Биз шаҳардан чеккароқ жойда яшардик. Шу боис онам билан тонг саҳарда туриб, марказга ишлаш учун келардик. Фастфуд егуликлари ва нон сотадиган ерда ишлаганмиз. Тушгача ишлаб, кейин мактабга кетардим.
Болалигимдаги энг катта қийинчилик уйсизлик билан боғлиқ. Ҳақиқатан ҳам у ерда уйимиз йўқ эди. Ижара уйда яшаш осон эмас. Аммо у кунларни қийинчилик дегим келмайди, чунки уйимиз бўлмагани билан жуда бахтли эдик. Онам камтарона бўлса-да, бахтли оила муҳитини яратиб берган.
Солиҳ
Instagram саҳифасида бир миллионга яқин обуначиси бўлган блогер, вайнер Солиҳ турли хил мавзудаги вайн олишидан ташқари реп йўналишида ижод қилувчи хонандалар билан дуэт куйлаган. Унинг рэпер Конста билан бирга ижро этган «Салом, хайр» таронаси ижтимоий тармоқларда машҳур бўлган.
Тимур Алихонов
Инстаблогер Тимур Алихонов ҳам турли хил мавзуларда вайн олади. Унинг Instagram саҳифасида 700 000 га яқин обуначи бор. Тимур Алихонов реп йўналишида ижод қилувчи хонандалар билан дуэт куйлаган. Блогернинг «Агарда пуллар» номли илк таронасига ишланган клип унинг ҳаётидан олинган, бу ҳақда унинг ўзи Instagram саҳифасида маълум қилган. Ушбу клип ҳозирга қадар 270 000 кўришлар сонини забт этган.
Низамо
Бошқа блогерлар каби ўзини хонандаликда синаб кўрган, Низамо тахаллуси остида ижод қилиб, асосан кулгили вайнлар олувчи Самандар Шохрух рэпернинг «Money» номли таронасини cover талқинида куйлаган. Ушбу тарона ҳам ижтимоий тармоқларда машҳур бўлган.
https://www.youtube.com/watch?v=ETL-Z2tlxF8
Мавзуга доир:
- 15 сония учун 500 доллар. Ўзбекистонлик таниқли вайнерларнинг Instagram’даги реклама нархи қанча?
- Instagram: «Афсонанинг қайтиши», президент билан учрашган санъаткорлар, тонировка ҳақидаги вайнлар, Лаълихонга айланган Нилуфар Усмонова
- Тиктокер ҳамда cover қўшиқлар ижрочиси Baby Mohi турмушга чиқди (фото, видео)
- Instagram: Ижодда танаффус қиладиган Юлдуз Усмонова, тўйи гала-концертга айланган Сардор Тоиров, Liil Xurramovнинг мухлисасига сюрпризи
Изоҳ (0)