Скупшина (Черногория парламенти) депутатлари бош вазир Дритан Абазович раҳбарлигидаги республика ҳукуматига ишончсизлик вотумини эълон қилди, деб ёзади «РБК».
Ҳукуматга нисбатан ишончсизлик вотуми ҳақидаги қарорни 50 нафар депутат қўллаб-қувватлади, бир нафар парламентарий бетараф қолди.
Овоз бериш собиқ ҳукмрон социалистлар Демократик партияси ташаббуси билан ўтказилди. Партиядагилар фикрича, парламент Евроиттифоқ билан яқинлашув масаласида мамлакатни олға сурмаяпти.
Бу депутатлар шу йил қабул қилган иккинчи ишончсизлик вотумидир. Февраль ойида Черногория парламенти 30 йил ичида биринчи марта мухолифат томонидан шакллантирилган Здравко Кривокапичнинг вазирлар маҳкамасига ишончсизлик вотумини эълон қилганди. Янги маҳкама апрель охиридаёқ тасдиқланди.
Ўшанда ҳукумат истеъфоси ташаббускори сифатида ҳукмрон коалиция партияларидан бири — ғарбпараст УРА ҳаракати чиққан эди. УРА ўз ташаббусини жорий маҳкама парламентда қўллаб-қувватланмаслиги ва шу туфайли Черногориянинг Евроиттифоққа аъзолик йўлидаги ҳаракати тўхтаб қолгани билан изоҳлаганди.
Изоҳ (0)