Россия ва Қозоғистон турли муассасалар даражасида фаол ҳамкорлик қилмоқда, хусусан, икки мамлакат ҳарбий вазирликлари Коллектив хавфсизлик тўғрисидаги шартнома ташкилоти (КХШТ) доирасида қўшма ҳарбий ўқув машқларига тайёргарлик олиб бормоқда. Бу ҳақда Россия президенти Владимир Путин қозоғистонлик ҳамкасби Қосим Жўмарт Тўқаев билан Сочида бўлиб ўтган учрашув чоғида айтиб ўтди, деб ёзади «РБК».
«Бизнинг вазирликларимиз ҳам, идораларимиз, ҳукуматлараро комиссияларимиз ҳам фаол ишлайди, ташқи ишлар вазирликларимиз, мудофаа вазирликларимиз биргаликда турли тадбирларни, шу жумладан, КХШТ доирасидаги қўшма ҳарбий машғулотларни ва бошқа нарсаларни тайёрламоқда», — деди Путин.
Шунингдек, у Москва ва Нур-Султон ўртасида товар айланмаси ўсаётганини қайд этди, чунончи, беш ой ичида деярли 9 фоизга ошган, бундан ташқари инвестициялар ҳажми ҳам ортган. «Россия Қозоғистоннинг савдо-иқтисодий шериклари орасида биринчи ўринда туради,… барча йўналишлар бўйича ишлар етарлича фаол равишда, ижобий тарзда бормоқда», — дея таъкидлади Путин.
Тўқаевнинг сўзларига кўра, ўтган йили мамлакатлар ўртасидаги савдо ҳажми 24,5 миллиард долларни ташкил қилган, 2022 йилда ҳам ҳамкорлик муваффақиятли ривожланишда давом этмоқда. Қозоғистон етакчиси мамлакатлар халқаро майдонларда ҳам, масалан, БМТда ҳамкорлик қилишини қайд этди. Тўқаев эслатишича, шу йил Қозоғистон МДҲда раислик қилмоқда, у ҳамдўстликнинг октябрда бўлиб ўтадиган саммитида Путин шахсан қатнашишига умид билдирди.
«Геосиёсий вазиятнинг ўзига хослиги бизга келишиб олиш зарурлигини кўрсатмоқда, эҳтимол янги вазифалар юзасидан ҳукуматларга қўшимча топшириқлар бериш орқали», — деди Тўқаев. Унинг айтишича, ҳозир Россия-Қозоғистон ҳамкорлигининг келажаги ҳақида «пессимистиc прогнозлар» қилиш учун асослар йўқ.
Учрашув аввалида давлат раҳбарлари қўл бериб ва қучоқлашиб кўришди. Иккаласи ҳам учрашишдан мамнунлигини қайд этди.
Жорий йилда Тўқаев ва Путин бир неча марта юзма-юз кўришди ва телефон орқали суҳбатлашди. Қозоғистон президенти июнда Петербург халқаро иқтисодий форуми (ПХИФ)га келиб, ЛХР ва ДХР бўйича баёнот берганди. У республикаларни «квазидавлат» деб атаган ва Нур-Султон уларни тан олмаслигини айтганди.
Ўшандан буён Россия ва Қозоғистон муносабатларида яна бир муаммо юзага келди: июлда Россия суди Қозоғистоннинг бутун экспорт нефтининг учдан икки қисмини ташувчи (шу жумладан Россия орқали) Каспий қувур консорциуми фаолиятини тўхтатиш ҳақида буйруқ чиқарди. Бундай қарор қабул қилинишига ишлаб чиқариш объектларида аниқланган экологик қоидабузарликлар сабаб бўлди.
Шундан кейин Тўаев нефть етказиб беришни диверсификация қилиш, шу жумладан, Россия ҳудудидан ўтмайдиган йўналишдан фойдаланиш ҳақида топшириқ берди. Кўп ўтмай, суд ўз қарорини ўзгартирди ва Каспий қувур консорциумига 200 минг рубль миқдорида жарима белгилади.
Изоҳ (0)