Россия президенти Владимир Путин франциялик ҳамкасби Эммануэль Макрон билан телефон орқали Украина атрофидаги вазиятни муҳокама қилди, деб ёзади «РБК».
Путин, хусусан, «Запорожье АЭС ҳудуди украиналик ҳарбийлар томонидан мунтазам ўққа тутилаётгани», бу «катта ҳудудларнинг радиациявий ифлосланишига олиб келиши мумкин бўлган катта кўламли офат хавфини яратаётгани»га эътибор қаратди.
«Президентлар АЭСга энг яқин вақтда МАГATЭ миссиясини йўналтириш муҳимлигини қайд этди, улар у ердаги ҳақиқий вазиятни баҳолаган бўларди. Россия томонидан агентлик инспекторларига зарур ҳамкорлик кўрсатишга тайёрлик тасдиқланди», — дейилади Кремль хабарида.
Бундан ташқари, Россия президенти Украина донини Қора денгиз портларидан олиб чиқиш бўйича битимга ҳамда Россия маҳсулотлари ва ўғитларининг дунё бозорларига экспортига тўхталиб ўтди ва Россия экспорти учун тўсиқлар сақланиб қолаётганини айтди.
Телефон суҳбати Франция томони ташаббуси билан ўтказилган. Президентлар мулоқотни давом эттиришга келишиб олган.
Украинада ҳарбий ҳаракатлар бошланганидан буён Россия ва Франция президентлари, Кремль хабарига кўра, телефон орқали ўнинчи марта суҳбатлашган. Сўнгги марта Путин ва Макроннинг мулоқоти ҳақида 28 май куни маълум қилинган эди.
Запорожье АЭС — Европадаги энг йирик атом электр станцияси. У Энергодар шаҳрида жойлашган. Март ойидан буён уни ва бутун шаҳарни Россия қўшинлари назорат қилиб келмоқда. Август ойида станция бир неча марта ўққа тутилди. Украина ва Россияда ушбу зарбаларда бир-бирини айбламоқда.
G7 мамлакатлари Москвани зудлик билан АЭС устидан назоратни Киевга қайтаришга чақирди, ушбу даъватни яна 35 та мамлакат қўллаб-қувватлади. БМТ АЭСдан ҳарбийлар ва техникани олиб чиқиб кетишни ва у ерда қуролсизлантирилган ҳудуд яратишни таклиф қилди. Ўз навбатида, Россия назорати остидаги Запорожье вилояти ҳукумати станция атрофида осойишталик режимини эълон қилишни таклиф этди.
Изоҳ (0)