Россия президенти Владимир Путин ва Хитой раҳбари Си Цзиньпин 16 сентябрь куни Шанхай ҳамкорлик ташкилотининг Ўзбекистондаги саммитида учрашув ўтказиши мумкин, деб хабар бермоқда The Wall Street Journal.
АҚШнинг Хитойга босими ошиши ва АҚШ Конгресси Вакиллар палатаси спикери Нэнси Пелосининг Тайванга ташрифи туфайли, етакчиларнинг учрашуви муддатидан олдин бўлиб ўтади: дастлаб улар Балидаги G20 саммитида кўришиши кутилаётган эди.
Хитойлик мансабдорлар сўзларига кора, Самарқандга сафар, шунингдек, Си Цзиньпин Ғарбнинг Хитойни тийиб туриш бўйича саъй-ҳаракатларига қарши туриш учун АҚШ билан иттифоқдош бўлмаган мамлакатлар билан хавфсизлик соҳасида яқин алоқаларни ривожлантириш мақсадига урғу беради.
Шу билан бирга, АҚШ Украина билан уруш туфайли Россиянинг Марказий Осиёдаги таъсири сусайиши фонида ушбу минтақада ўз ўрнини мустаҳкамлаш ҳақида ўйлаяпти, дейилади хабарда.
Аввалроқ Россия президенти Владимир Путин ва Хитой Халқ Республикаси раиси Си Цзиньпин ноябрь ойида Балида бўлиб ўтадиган G20 саммитида шахсан иштирок этишни режалаштираётгани ҳақида Индонезия президенти Жоко Видодо маълум қилганди.
Маълумот учун, 15—16 сентябрь кунлари Самарқанд Шанхай ҳамкорлик ташкилотининг навбатдаги саммитида мезбонлик қилади.
Шанхай ҳамкорлик ташкилотининг Самарқанд саммити Эрон 2021 йил сентябрида ташкилотга тўлақонли иштирокчи сифатида қўшилганидан бери биринчиси бўлади. ШҲТга аъзо давлатлар: Ўзбекистон, Хитой, Россия, Қозоғистон, Қирғизистон, Тожикистон, Покистон, Ҳиндистон ва Эрон. Афғонистон, Мўғулистон ва Беларусь ташкилотда кузатувчи, Туркия эса мулоқот бўйича ҳамкор сифатида иштирок этади.
Саммитда ташкилотга аъзо кўплаб давлатлар билан умумий чегарага эга Афғонистондаги вазият ҳар томонлама муҳокама қилинади ва муҳим қарорлар қабул қилиниши кутилмоқда.
Изоҳ (0)