Гарри Поттер ҳақидаги китоблар муаллифи Жоан Роулинг Twitter’да таҳдидларга учраганидан кейин, Шотландия полицияси текширув бошлади, деб ёзади Meduza.
АҚШда келиб чиқиши ҳинд бўлган британиялик ёзувчи Салмон Рушдийга қилинган ҳужумдан кейин Роулинг Twitter’да «Ўзимни жуда ёмон ҳис қиляпман. У соғайиб кестин», — деган пост қолдирди. Унга жавобан фойдаланувчилардан бири, ўзини жамоат арбоби деб таърифлаган МеерАсифАзиз1: «Хавотир олма, сен кейингисисан», — деб ёзди.
«Мени қўллаб-қувватлаб хабар юборганларнинг ҳаммасига, раҳмат, — деб ёзди Роулинг эртаси куни. — Полиция бу иш билан шуғулланяпти (бунгача у бошқа таҳдидлар билан шуғулланаётган эди)».
75 ёшли Салмон Рушдий Нью-Йорк штатида маъруза ўқишга тайёрланаётган пайтда ҳужумга учради. Гумонланувчи, 24 ёшли Хади Матар ёзувчига пичоқ билан бир неча марта зарба берган. Рушди касалхонага ётқизилди, икки кун давомида у сунъий нафас олдириш аппаратига улаб қўйилди. 14 август куни ёзувчи аппаратдан узиб қўйилди. У оиласи билан гаплашишга муваффақ бўлди, аммо аҳволи оғир бўлиб қолмоқда.
Хади Матар суиқасд ва ҳужум қилиш айбловини тан олмаяпти, прокурор эса буни «олдиндан режалаштирилган» жиноят деб атади.
Нашр қайд этишича, Жоан Роулинг трансгендер одамлар ҳақида айтган фикрлари учун кўп бора танқидларга учраган. 2021 йил ноябрида эса унга ўлим билан таҳдид қилишган.
Изоҳ (0)