Garri Potter haqidagi kitoblar muallifi Joan Rouling Twitter’da tahdidlarga uchraganidan keyin, Shotlandiya politsiyasi tekshiruv boshladi, deb yozadi Meduza.
AQSHda kelib chiqishi hind bo‘lgan britaniyalik yozuvchi Salmon Rushdiyga qilingan hujumdan keyin Rouling Twitter’da “O‘zimni juda yomon his qilyapman. U sog‘ayib kestin”, — degan post qoldirdi. Unga javoban foydalanuvchilardan biri, o‘zini jamoat arbobi deb ta’riflagan MeerAsifAziz1: “Xavotir olma, sen keyingisisan”, — deb yozdi.
“Meni qo‘llab-quvvatlab xabar yuborganlarning hammasiga, rahmat, — deb yozdi Rouling ertasi kuni. — Politsiya bu ish bilan shug‘ullanyapti (bungacha u boshqa tahdidlar bilan shug‘ullanayotgan edi)”.
75 yoshli Salmon Rushdiy Nyu-York shtatida ma’ruza o‘qishga tayyorlanayotgan paytda hujumga uchradi. Gumonlanuvchi, 24 yoshli Xadi Matar yozuvchiga pichoq bilan bir necha marta zarba bergan. Rushdi kasalxonaga yotqizildi, ikki kun davomida u sun’iy nafas oldirish apparatiga ulab qo‘yildi. 14-avgust kuni yozuvchi apparatdan uzib qo‘yildi. U oilasi bilan gaplashishga muvaffaq bo‘ldi, ammo ahvoli og‘ir bo‘lib qolmoqda.
Xadi Matar suiqasd va hujum qilish ayblovini tan olmayapti, prokuror esa buni “oldindan rejalashtirilgan” jinoyat deb atadi.
Nashr qayd etishicha, Joan Rouling transgender odamlar haqida aytgan fikrlari uchun ko‘p bora tanqidlarga uchragan. 2021-yil noyabrida esa unga o‘lim bilan tahdid qilishgan.
Izoh (0)