Еревандаги «Сурмалу» савдо марказида юз берган портлаш оқибатида ҳалок бўлганлар сони олти кишига етди, бедарак йўқолганлар рўйхатида яна 16 киши бор, деб ёзади «РБК» Арманистон ФВВга таяниб.
Уч аёл ва бир эркак ҳалок бўлган, яна икки кишининг шахси аниқланганича йўқ. ФВВ раҳбари Армен Памбухчян маълум қилишича, 23 киши тиббий ёрдам олмоқда.
Қидирув ишлари давом этяпти, айни пайтда воқеа жойида 70 га яқин қутқарувчи ишламоқда. Етти нафар мутахассис ишлар чоғида турли жароҳатлар олган, уларнинг икки нафари касалхонага ётқизилган.
Ереван савдо марказидаги портлаш 14 август куни содир бўлди. «Новости-Армения» мушаклар (фейерверклар) сақланадиган омбор ёниб кетганини маълум қилди. Ёнғинга мураккаблик бўйича учинчи даража берилди. 14 август куни кечқурун Арманистон ФВВ матбуот котиби 61 киши жабрланганини хабар қилди.
Мамлакат бош прокуратураси осон алангаланувчи моддаларни сақлаш қоидаларининг бузилиши ва ёнғин хавфсизлиги қоидаларининг бузилиши каби иккита модда бўйича жиноят иши қўзғатди. Ҳозирча портлаш сабаблари аниқланмаган.
Мавзуга доир: Фоторепортаж: Еревандаги портлашнинг аянчли оқибатлари
Изоҳ (0)