АҚШ Вакиллар палатаси спикери Нэнси Пелосининг Тайванга сафаридан кейин икки ҳафта ўтар-ўтмас, Америка конгрессменлари делегацияси икки кунлик ташриф билан оролга келди, деб ёзади «РБК».
Тайванга Конгресснинг беш нафар аъзоси — демократ сенатор Эд Марки ва Вакиллар палатаси аъзолари — демократлар Жон Гараменди, Алан Лоуэнталь, Дон Байер, шунингдек, республикачи Амата Коулман Радваген келди. Улар оролда 14—15 август кунлари бўлади, деб аниқлик киритди Тайван Америка институти (у де-факто мамлакатдаги АҚШ элчихонаси фаолиятини амалга оширади).
Конгрессменлар қисман тан олинган давлат президенти Цай Инвэнь ва Тайвань ҳукуматининг бошқа вакиллари билан учрашиб, икки томонлама алоқалар, минтақавий хавфсизлик, иқтисодий ҳамкорлик, иқлим ўзгариши ва бошқа мавзуларни муҳокама қилади.
Taiwan News ёзишича, делегацияга раҳбарлик қилувчи Марки 1979 йилда Вакиллар палатаси аъзоси сифатида Тайвань билан алоқалар тўғрисидаги қонун қабул қилиниши учун овоз берган бўлиб, у Вашингтоннинг орол давлат хавфсизлигини таъминлаш бўйича мажбуриятларини кўзда тутади.
Хитой ва Тайвань алоқалари оролга 2 август куни АҚШ Вакиллар палатаси спикери Нэнси Пелосининг ташрифидан кейин кескинлашди. ХХР Тайванни ўз ҳудуди деб ҳисоблайди ва унинг Хитой дипломатик муносабатлар ўрнатган мамлакатлар вакиллари билан алоқаларига қарши чиқади, бундай мулоқотлар унинг суверенитетини бузади, деб ҳисоблайди. АҚШ, ўз навбатида, Пелосининг сафари уларнинг Тайванга нисбатан сиёсатига мувофиқ келишини ва «зиддият учун ҳеч қандай сабаблар йўқ»лигини қайд этди.
Нэнси Пелосининг Тайванга ташрифига жавобан Хитой ҳарбийлари ўқ отиш машқлари билан денгиз ва ҳаво машғулотларини бошлади.
АҚШ, Япония ва Австралия ташқи сиёсий идоралари раҳбарлари Хитойни зудлик билан Тайвань яқинидаги ҳарбий машғулотларни тўхтатишга чақириб, бу хатти-ҳаракатлар «халқаро тинчлик ва барқарорликка жиддий таъсир ўтказаётгани»ни таъкидлади.
Пентагон қўмондонлиги кескинлик фонида бир неча марта Хитой армияси қўмондонлиги билан боғланишга уринди, бироқ улар қўнғироқларга жавоб бермади.
Изоҳ (0)