Андижонда адлия аралашуви билан тадбиркорларга 1 миллиарддан ортиқ компенсация пули ундириб бериладиган бўлди

Андижон шаҳар адлия бўлими аралашуви билан икки нафар тадбиркорга ҳокимликдан 1 миллиард сўмдан ортиқ компенсация пуллари ундириб бериладиган бўлди. Бу ҳақда «Дарё»га вилоят адлия бошқармаси ахборот хизмати хабар бермоқда.

Маълум қилинишича, Андижон шаҳар адлия бўлимига «Нодира» хусусий корхонаси ва «Gigant golden» МЧЖ раҳбарлари мурожаат қилиб, ушбу корхоналарга тегишли бўлган савдо дўконининг бино-иншоотлари Андижон шаҳар ҳокимлиги томонидан давлат ва жамоат эҳтиёжлари учун олиб қўйилиб, бузилганлиги сабабли компенсация тўланмаганини маълум қилган.

Ўрганиш давомида Андижон шаҳар ҳокимининг 2015- ва 2018 йиллардаги қарорларига асосан «Gigant golden» МЧЖга тегишли Андижон шаҳар, А.Фитрат кўчасидаги 180,42 кв/метр ер участкасида жойлашган савдо дўкони бино-иншооти бузилишга тушган. Шу муносабат билан 2019 йилда бино бузилиб, ер майдони шаҳар ҳокимлиги захирасига олиб қўйилган. Шунингдек, Андижон шаҳар ҳокимлиги билан мулкдор ўртасида 2019 йил 16 августда тасдиқланган келишув шартномасига кўра, савдо дўкони бузилишга тушганлиги сабабли, товон пули ўрнига шаҳар ҳокимлиги томонидан ҳокимлик захирасидаги ер майдонларидан якка тартибда турар-жой бинолари қуриш учун ҳар бири 400,0 кв.метрдан иборат 3 дона ер участкаси ажратиб бериш мажбуриятини олган.

«Бироқ икки йил давомида келишув шартномаси шартлари бажарилмасдан қолиб кетган. Бундан ташқари президентимизнинг тегишли фармонларига асосан 2021 йилнинг 1-агустидан маҳаллий давлат ҳокимияти органларининг ер участкаларини тўғридан-тўғри ажратиш, фойдаланишга бериш, келгусида ажратиш учун захиралаш, бириктириш, ободонлаштириш учун бериш ёки ерларни бошқача йўл билан тасарруф қилиш бўйича ваколатлари бекор қилинган. Натижада шаҳар ҳокимлиги томонидан ‘Gigant golden’ МЧЖга илгари олиб қўйилган ер майдонига тенг қийматли ер майдони ажратиб беришнинг имкони йўқолган. Ўрганиш давомида Андижон шаҳар ҳокимлиги томонидан ‘Нодира’ хусусий корхонаси ҳамда ‘Gigant golden’ МЧЖга олиб қўйилган ер майдони ва бузилган бино-иншоотлари учун компенсация тўловлари тўлиқ тўлаб берилмаганлиги аниқланди. Шунга кўра, адлия бўлими томонидан тадбиркорларга зарарни ундириб беришни сўраб, Андижон туманлараро иқтисодий судига даъво аризалар киритилди», — дейди шаҳар адлия бўлими бошлиғи Озодбек Ғофуров.

Суднинг 2022 йил 22 июлдаги ҳал қилув қарорларига асосан даъволар тўлиқ қаноатлантирилиб, Андижон шаҳар ҳокимлигидан «Нодира» хусусий корхонаси фойдасига бузилган савдо дўкони бино-иншооти учун баҳолаш хулосаси асосида 672 миллион 790 минг 220 сўм компенсация тўлови ва 2 миллион 241 минг сўм моддий зарар, «Gigant golden» МЧЖ фойдасига эса 403 миллион 674 минг 132 сўм компенсация тўлови ва 4 миллион 493 минг 205 сўм моддий зарарни ундириш белгиланган.