Тошкент шаҳри Яккасарой тумани Шота Руставели кўчасида дарахтлар шикастланиши билан боғлиқ яна бир ҳолат аниқланди. Бу ҳақда Давлат экология қўмитаси хабар қилди.
Қайд этилишича, ижтимоий тармоқда тарқалган мурожаат юзасидан қўмита масъуллари ва Тошкент шаҳар экология бошқармаси ходимлари, Яккасарой тумани ҳокимияти ҳамда жамоатчилик вакиллари томонидан жойига чиқиб ўрганиш ишлари амалга оширилган. Натижада Шота Руставели кўчасидаги 28-уй ёнида қурилиш компанияси томонидан қурилиш ишлари олиб борилаётгани аниқланган. Мазкур қурилиш ишлари жараёнида 5 туп чинор ва 7 туп каштан дарахтларининг илдиз қисмларига ўсишдан тўхтамайдиган даражада шикаст етказилган. Дарахтларнинг суғориш тизими олиб ташланган.
Бунинг оқибатида Ўзбекистон Республикасининг «Ўсимлик дунёсини муҳофаза қилиш ва ундан фойдаланиш тўғрисида»ги қонунининг 26 ва 32-моддалари талаблари бузилган.
Дарахтларни муҳофаза қилиш ва сақлашга доир қонунчиликда белгиланган чораларни кўрмаганлиги учун Миллиметре cонструcтион cомпанй МЧЖ раҳбари У.Р.га нисбатан Маъмурий жавобгарлик тўғрисидаги кодексининг 79-моддаси (дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) 3-қисми билан тегишли ҳужжатлар расмийлаштирилди ва ҳуқуқни муҳофаза қилувчи органларга қонуний чора кўриш учун тақдим этилмоқда.
Шунингдек, қурилиш компанияси масъулларига ҳудуддаги мавжуд дарахтларни муҳофаза қилиш, уларга биотехник тадбирларни амалга ошириш ва экологик талаблар юзасидан тегишли кўрсатмалар берилиб, кафолат хати олинган.
Изоҳ (0)