АҚШ президенти Жо Байден Финляндия ва Швецияни НАТОга қабул қилиш ҳақидаги келишувларни ратификация қилиш тўғрисидаги протоколларни имзолади, деб ёзади «РБК».
Оқ уй матбуот хизмати қайд этишича, ҳужжатларни имзолашдан олдин давлат раҳбари Швеция бош вазири Магдалена Андерссон ва Финляндия президенти Саули Ниинистё билан суҳбатлашган.
«Президент Байден АҚШ бизнинг умумий хавфсизлигимизга ҳар қандай таҳдидларга нисбатан огоҳликни сақлаш, шунингдек, тажовузларга ёки тажовуз хавфига қарши кураш ва уни тийиб туриш учун Финляндия ва Швеция билан иш олиб боришини тасдиқлади», — дея маълум қилди президент маъмурияти унинг иккала мамлакат вакиллари билан телефон суҳбати якунларига кўра.
АҚШ Сенати Финляндия ва Швециянинг НАТОга қўшилиши ҳақидаги протоколларни ратификация қилиш тўғрисидаги резолюцияни 4 август куни маъқуллаган эди. Мамлакатларнинг альянсга қўшилишини ёқлаб 83 сенатор овоз берган, бир киши қарши чиққан.
Шу тариқа, резолюция зарур бўлган 67 тадан ортиқ овоз билан қабул қилинди, АҚШ эса қонун чиқаурвчи органлари НАТОнинг кенгайиши ҳақидаги ҳужжатни ратификация қилган 20 дан ортиқ мамлакатлар рўйхатини тўлдирди. Швеция ва Финляндия НАТО блокига қўшилиши учун альянсга аъзо бўлган 30 та мамлакатнинг барчаси тегишли битимни ратификация қилиши керак.
18 май куни Финляндия ва Швеция Украинадаги жанговар ҳаракатлар авж олган бир пайтда НАТОга қўшилиш учун ариза берган. Туркия Хельсинки ва Стокгольмни мамлакатда тақиқланган Курдистон Ишчилар партияси билан ҳамкорликда айблаб, уларнинг альянсга қўшилишга бир муддат тўсқинлик қилди.
12 июль куни АҚШ президенти Жо Байден АҚШ Конгресси Сенатига мамлакатларнинг НАТОга кириши ҳақидаги протоколларни ратификация қилиш учун киритди. 19 июль куни резолюция Вакиллар палатаси томонидан маъқулланди. Россия президенти Владимир Путин Финляндия ва Швеция ўз ҳудудига альянснинг ҳарбий инфратузилмасини жойлаштирса, Москва тегишли жавоб беришга мажбур бўлишини айтди.
Аввалроқ Финляндия ва Швециянинг НАТОга қўшилиши ҳақидаги протоколлар Польша, Эстония, Исландия, Канада томонидан ратификация қилинган эди.
Изоҳ (0)