Япония ҳукумати тўлиқ таркибда истеъфога чиқди

Япониянинг амалдаги бош вазири Фумио Кисиданинг вазирлар маҳкамаси тўлиқ таркиб билан истеъфога чиқди, деб ёзади «РБК».

Бу Япония ҳукуматида кутилаётган ўрин алмашишларга тайёргарлик фонида юз берди. Kyodo агентлиги маълумотларига кўра, Кисида жамоатчилик ишончи пасайиб кетгани туфайли ўз вазирлар маҳкамасини қайтадан шакллантирмоқчи. Шунингдек, бош вазир баъзи ҳукумат аъзоларининг «Бирлашув черкови» диний мазҳаби билан алоқалари юзасидан айбловлардан қочишга интилмоқда, ушбу мазҳаб Япония собиқ бош вазири Синдзо Абэ ўлдирилганидан кейин аҳоли эътиборини тортди.

Asahi Shimbun газетаси маълумотларига кўра, Япония Мудофаа вазирлигига Ясукадзу Хамада раҳбар бўлиши керак, у ушбу лавозимда 2008—2009 йилларда ишлаган эди. Иқтисодий хавфсизлик вазири Сиёсий тадқиқотлар кенгаши раиси Санаэ Такаити, соғлиқни сақлаш, меҳнат ва ижтимоий таъминот вазири эса вазирлар маҳкамаси собиқ бош котиби Кацунобу Като бўлади.

Ташқи ишлар вазири, молия вазири, иқтисодий қайта тикланиш вазири, ер, инфратузилма, транспорт ва туризм вазири ўз лавозимларида қолади. Рақамли технологиялар ҳамда иқтисодиёт, савдо ва саноат вазирлари ҳам алмашади.

Вазирлар маҳкамаси бош котиби Хирокадзу Мацуно ҳам ўз лавозимида қолади.

Япония ҳукуматидаги бўлғуси ўзгаришлар ҳақида ўтган ҳафтадаёқ маълум бўлганди. 6 август куни бу ҳақда Кисиданинг ўзи эълон қилганди.

Айни вақтда Asahi Shimbun газетаси сиёсий жамғармалар кирим-чиқимлари ҳақидаги ҳисоботга таянган ҳолда қайд этишича, янгиланган вазирлар маҳкамасининг камида уч аъзоси «Бирлашув черкови» билан боғлиқдир.

Ушбу сектани жорий йил июлида Япония собиқ бош вазири Синдзо Абэни ўлдирган Нара шаҳрининг 42 ёшли фуқароси Тэцуя Ямагами танқид қилган эди. Унинг фикрича, сиёсатчи ушбу мазҳабга алоқадор бўлган. Эркакнинг онаси ташкилотга ўз пулларини ўтказгани туфайли, унга нисбатан аламзада бўлган. Kyodo маълумотларига кўра, аёл «Бирлашув черкови»га қарийб 100 миллион иена (720 минг доллар) хайрия қилган.

Тэцуя Ямагамининг тоғаси айтиб беришича, аёл 1990 йилларда турмуш ўртоғи ўз жонига қасд қилганидан кейин сектага тушиб қолган. Аёл эрининг ўлимидан кейин тўланган суғурта пулларини, шунингдек, оилавий кўчмас мулклар сотувидан тушган пулларни унга хайрия қилган. Ямагами эса оилада пул етишмовчилиги туфайли ўқишини ташлашга мажбур бўлган. Черковнинг ўзидагилар эса 50 миллион иенани қайтариб берганликларини маълум қилишди, Ямагамининг онаси номидан қилинган хайриялар ҳақида ҳеч қандай қайдлар бўлмаганини ҳам қўшиб қўйишди. Унинг тоғаси ташкилотни жавобгарликдан қочишга уринишда айблади.