Россия Запорожье АЭС ўққа тутилиши юзасидан БМТ Хавфсизлик кенгаши мажлисини ўтказишни талаб қилди

Россия Запорожье атом электр станциясининг ўққа тутилиши туфайли 11 август куни БМТ Хавфсизлик кенгаши мажлисини ўтказишни талаб қилди, деб ёзади «РБК».

Россия томони «сўнгги кунларда Запорожье АЭСга Украина томонидан бўлаётган ҳужумлар ва уларнинг эҳтимолий ҳалокатли оқибатлари юзасидан» брифинг ўтказилишини сўраган.

Шунингдек, Россия МАГАТЭ бош директори Рафаэль Гросси маърузачи сифатида қатнашишини сўраган.

Айни пайтда АҚШ Россияни Запорожье АЭС устидан назоратни Украинага беришга чақирмоқда.

«Биз Россияни Украина ядро объектларида ёки уларнинг яқинида барча ҳарбий операцияларни тўхтатишга, шунингдек, ушбу объектлар устидан тўлиқ назоратни Украинага қайтаришга чақиришда давом этамиз», — деди Оқ уй матбуот котиби Карин Жан-Пьер брифинг чоғида.

Запорожье АЭС — Европадаги энг йирик атом электр станцияси. У Энергодар шаҳрида жойлашган. 28 февраль куни, Украинада ҳарбий операция бошланганидан кейин тўрт кун ўтиб, Россия Мудофаа вазирлиги Запорожье АЭС ҳудуди назорат остига олинганини маълум қилганди.

7 август куни Энергодар ҳарбий-фуқаролик маъмурияти Украина қўшинлари тунда Запорожье АЭСга «Ураган» баравар ўт очиш реактив тизимлари билан зарбалар берганини маълум қилди. Ракета парчалари ишлаб турган энергоблок яқинига келиб тушгани даъво қилинди. Россия Мудофаа вазирлиги маълумотларига кўра, АЭС ва Энергодар ҳудудига Украина томонидан 152 миллиметр калибрли 20 та снаряд отилган.

«АЭСда 3-энергоблок қурилмаларининг бир қисми токдан узилиб қолди, 4-энергоблок ишлаб чиқараётган қувват камайди, водород қувурига зарар етди, водород станциясида водороднинг аланга бўлиб ёниши юз берди», — деб Россия мудофаа идораси электр станциясига етган зарарни изоҳлаган эди.

Аввалроқ Россия ҳукумати Халқаро атом энергияси агентлиги (МАГАТЭ) раҳбариятига делегациянинг АЭСга ташрифини ташкиллаштиришда ёрдам беришга тайёрлигини билдирган эди. БМТ бош котиби Антониу Гутерриш МАГАТЭ инспекторларига электр станциясига кириш имкониятини беришга чақирган ва унга берилган зарбаларни «ўз жонига қасд қилиш» деб атаган эди. Айни вақтда Россия ТИВ БМТ котибиятини ташрифга тўсқинлик қилишда айбламоқда (МАГАТЭ БМТ раҳбарлиги остида ишлайди).

Россия томони Запорожье АЭСнинг Украина томонидан давомли ўққа тутилиши глобал техноген ҳалокатга олиб келиши мумкинлиги, станция хавф остида тургани ҳақида огоҳлантирди.