Хабарингиз бор, «Ўзбекнефтгаз» АЖ бошқарув раиси Меҳриддин Абдуллаев 2022 йилнинг 8 февраль кунидан бошлаб Ўзбекистон енгил атлетика федерацияси раиси сифатида ҳам иш бошлаган эди.
Ўтган қисқа даврда, Меҳриддин Абдуллаев спорт мураббийлари ва спортчилар билан бир неча бора учрашиб, селексия ишларига жиддий эътибор қаратди. Иқтидорли ёшлар учун яратилган шароит ҳамда имкониятлар билан танишиб, атлетларнинг хорижда машғулот ўташлари, ўзаро тажриба алмашишлари учун барча шароитлар яратилди.
Шу жумладан, ҳам маънан, ҳам моддий жиҳатдан уларни қўллаб-қувватлаш чоралари кўрилди ва бу ўз натижасини узоқ куттирмади. Август ойининг илк кунлариданоқ мусобоқаларда иштирокини бошлаган атлетларимиз кетма-кет ғалаба қозонди.
2022 йилнинг 6 август куни енгил атлетика бўйича Польшада «Бриллиант лига» мусобақаси бўлиб ўтди. Енгил атлетиканинг баландликка сакраш йўналиши бўйича жаҳоннинг энг кучли спортчиларидан бири бўлган ҳамюртимиз Safina Садуллаева «Бриллиант лига» мусобақасида олтин медални қўлга киритди.
Алоҳида таъкидлаш керакки, Сафина жаҳон чемпионатидан кейинги нуфузли ўринда турувчи мусобақада ғалаба қозонган биринчи ўзбекистонлик атлетга айланди. У шундай тарзда ўз номини зарҳал ҳарфлар билан ўзбек спорти тарихига ёзиб қўйди.
1-ўрин. Сафина Садуллаева (Ўзбекистон) 1.92 метр.
2-ўрин. Ярослава Магучих (Украина) 1.92 метр.
3-ўрин. Катерина Табачник (Украина) 1.88 метр.
Яна бир атлетимиз Шарифа Давронова Жаҳон чемпиони деган юксак номга сазовор бўлди. Колумбиянинг Кали шаҳрида енгил атлетика бўйича ёшлар ўртасидаги (U20) жаҳон чемпионатида 15 ёшли Шарифа Давронова уч ҳатлаб сакраш дастурида (14,02 м) ғалаба қозонди. У энг яқин таъқибчисини 66 сантиметрга ортда қолдирди. Шунингдек, атлетнинг натижаси U20 таснифида мавсумнинг энг яхши кўрсаткичи бўлди. Мазкур йўналишда кучли учликда Ўзбекистондан ташқари Франция ва Австралия вакиллари бор.
• 1-ўрин — Шарифа Давронова (Ўзбекистон) — 14,04 метр.
• 2-ўрин — Сохане Аукагос (Франция) — 13,38 метр.
• 3-ўрин — Тиана Борас (Австралия) — 13,30 метр.
«Ўзбекнефтгаз» АЖ бошқарув раиси ҳамда Ўзбекистон енгил атлетика федерацияси раиси Меҳриддин Абдуллаев терма жамоа аъзоларига табрик йўллаб, уларнинг бу ғалабалари ёшларга ажойиб намуна бўлганини таъкидлади ҳамда ўзининг самимий тилакларини билдирди.
«Ўзбекнефтгаз» матбуот хизмати
Изоҳ (0)