«Коммерсантъ» нашрининг хабар беришича, Озарбайжон Мудофаа вазирлиги Арманистон билан чегарада ва Тоғли Қорабоғда ўт очишни тўхтатиш режими бузилганини маълум қилган. Боку арман ҳарбийлари Озарбайжон позицияларини ўққа тутганини даъво қилмоқда. Тан олинмаган Тоғли Қорабоғ Республикаси расмийлари бунга жавобан Озарбайжонни отишмада айблади. Арманистон Мудофаа вазирлиги эса Озарбайжон ҳарбий бошқармаси баёнотини дезинформация деб атаган.
Вазирлик маълумотларига кўра, сўнгги 24 соат ичида «Арман қуролли тузилмалари» Озарбайжон армиясининг позицияларини ўн марта ўққа тутган. Хусусан, Россия тинчликпарвар кучлари жойлашган ҳудудлардан «ноқонуний арман қуролли тузилмалари» аъзолари снайпер милтиқлари ва турли ўлчамдаги ўқотар қуроллардан ўқ узган. Бироқ томонлар ҳеч қандай зарар кўрмаган.
Барча ҳолларда Озарбайжон армиясининг бўлинмалари тегишли жавоб чораларини кўрди. Озарбайжон–Арманистон давлат чегарасидаги, шунингдек, Россия тинчликпарвар кучлари вақтинча жойлашган Озарбайжон ҳудудида сўнгги пайтларда юзага келган кескинлик учун барча жавобгарлик Россия Федерацияси ҳукумати билан боғлиқ, — дейилади Озарбайжон Мудофаа вазирлиги матбуот баёнотида.Степанокерт бунга жавобан Озарбайжонни сулҳни бузганликда айблади. «Душман 7 августдан 8 августга ўтар кечаси чегаранинг бир неча йўналишида ўқ ўқотар қуроллардан фойдаланди», — дейилади «ДҚР» ҳарбий қўмондонлиги баёнотида.
Озарбайжон Мудофаа вазирлиги сўнгги кунларда Арманистон Қуролли кучлари бўлинмалари Арманистон–Озарбайжон чегарасининг бир неча йўналишларида жойлашган Озарбайжон позицияларини ўққа тутгани ҳақида дезинформация тарқатишда давом этмоқда, — дейилади Арманистон Мудофаа вазирлиги хабарида.3 август куни Боку «Қасос» махсус операцияси давомида Қорабоғда бир қанча баландликларни қўлга киритилгани ҳақида хабар берди. Арманистон бош вазири Никол Пашинян Россия тинчликпарвар кучлари минтақада ҳаракат қилиши кераклигини, акс ҳолда уларнинг у ерда бўлиши «бир қанча саволлар туғдириши»ни айтди. Қорабоғда отишмалар дам олиш кунлари, 6- ва 7 август кунлари ҳам давом этган.
Мавзуга доир: Блинкен Ереван ва Бокуни Қорабоғ можаросини тўғридан-тўғри музокаралар йўли билан ҳал қилишга чақирди
Изоҳ (0)