Россия авиакомпаниялари, жумладан, Аэрофлот ҳам санкциялар туфайли сотиб ололмайдиган эҳтиёт қисмлари учун бошқа самолётларини бузиб ташлашни бошлаган. Бу ҳақда саноатдаги манбаларга таяниб, Meduza хабар бермоқда.
Ҳозирда Аэрофлот камида битта Sukhoi Superjet-100 ва битта Airbus-А350 самолётларини демонтаж қилган (улар «деярли янги» эди, дея таъкидлайди манба). Ускуналар бир жуфт Boeing-737 ва Airbus-А320 самолётларидан ҳам олиб ташланган.
Шунингдек, Россиянинг бошқа авиакомпаниялари қайси самолётларни демонтаж қилишни бошлагани ҳозирча аниқланмаган.
Flightradar хизмати маълумотларига кўра, июль ойи охиридан бери Аэрофлот ўзининг 50 га яқин самолётларини ишлатмаган. Компаниянинг еттита Airbus-А350 самолётидан учтаси (жумладан, биттаси ҳозирда эҳтиёт қисмлар учун ажратилган) уч ойдан бери учмаган, деб ёзади Reuters.
Маълумот учун:
- Февраль ойи охирида Европа Иттифоқи рус самолётлари учун ўз ҳаво йўлларини ёпди, улар учун эҳтиёт қисмларни етказиб беришни, техник хизмат кўрсатишни ва суғурталашни тақиқлади, шунингдек, лизинг компанияларини Россия авиаташувчилари учун ижарага олинган самолётларни қайтаришни мажбур қилган.
- Май ойида Bloomberg агентлиги эксперт ҳисоб-китобларига таяниб, Boeing ва Airbus авиалайнерлари учун бутловчи қисмлар етишмаслиги сабабли Аэрофлот ёз охиригача ўз самолётларини қисмларга ажратишни бошлаши кераклигини хабар қилган эди.
- Июль ойида бош вазир ўринбосари Юрий Борисов, транспорт вазирлиги ҳисоб-китобларига кўра Россия авиакомпаниялари мавжуд Airbus ва Boeing самолётлари паркини беш йил давомида хафвсиз бошқариши мумкинлигини эълон қилган эди.
Изоҳ (0)