Уруш бошланганидан бери Россия армиясининг Украинадаги ҳалок бўлганлар ва ярадорлар сони 70-80 минг кишини ташкил этди, деди АҚШ мудофаа вазирининг сиёсий масалалар бўйича ўринбосари Колин Кал. Бу ҳақда CNN хабар бермоқда.
Руслар урушда олти ойдан камроқ вақт ичида 70 ёки 80 минг кишини йўқотди, деб ҳисоблаш учун асос бор», — дейди Колин Кал.Унинг сўзларига кўра, гап ҳалок бўлганлар ва ярадорларнинг тахминий йўқотишлари ҳақида кетмоқда.
Вазир ўринбосари бундай йўқотишларни «сезиларли» деб атади ва Россиянинг Украинага бостириб киришида мамлакат президенти Владимир Путин эълон қилган мақсадларининг бирортасига ҳам эришмаганини таъкидлаган.
Афғонистондаги урушда Совет армиясининг йўқотишлари ҳам тахминан худди шундай эди. Фақат ўша уруш деярли 10 йилни ўз ичига олган. Москва «махсус операция» деб атайдиган ҳаракатлар эса олти ойдан камроқ вақтдан бери давом этмоқда.
Расмий маълумотларга кўра, Афғонистонда 1979–1989 йилларда 15 мингга яқин совет аскари ҳалок бўлган, 50 мингдан зиёди яраланган.
Бундан кейинги Россия олиб борган урушларда Москванинг ҳарбий йўқотишлари камроқ бўлган. Memorial маълумотларга кўра, биринчи Чечен урушида 4 минг 300 дан ортиқ одам ҳалок бўлган бўлса яна 1 минг 200 киши бедарак йўқолган ва 19 мингдан ортиқ одам яраланган. Иккинчи Чечен урушида эса, Мудофаа вазирлиги маълумотларига кўра, 4,5 мингдан ортиқ одам нобуд бўлган, 15,5 мингдан ортиқ аскар яраланган.
Маълумот учун:
- Июль ойи охирида Марказий разведка бошқармаси директори Уильям Бернс Россиянинг Украинадаги йўқотишлари ҳақида: 45 мингга яқин аскар ярадор бўлиши мумкинлигини айтган эди. Британия Мудофаа вазири Бен Уоллес ҳам апрель ойи охирида Украинада 15 минг россиялик нобуд бўлганини маълум қилган.
- «Медиазона» ва BBC 8 августга қадар очиқ маълумотлар асосида Украинада россиялик 5424 аскар ва зобит ҳалок бўлганини тасдиқлади.
- Россия Мудофаа вазирлиги йўқотишлар ҳақидаги маълумотларни охирги марта уруш бошланганидан бир ой ўтиб келтирган эди. 25 мартга келиб, агентлик маълумотларига кўра, 1351 киши ҳалок бўлган, 3825 аскар яраланган.
Изоҳ (0)