Италиянинг Maire Tecnimont компанияси мамлакатнинг Россиядан табиий газга қарамлигини камайтириш учун янги ечим устида ишламоқда. Компания бунга чиқиндиларни қайта ишлаш орқали эришмоқчи, деб ёзади Bloomberg.
«Яшил айлана округи» лойиҳаси экологик тоза кимёвий моддалар ва ёқилғи ишлаб чиқариш учун полигон чиқиндиларидан углерод ва водород ажратиб олишни назарда тутади.
Компаниянинг бош ижрочи директори Алессандро Бернинининг сўзларига кўра, ҳар йили мамлакатдаги чиқиндихонага 16 млн тоннага яқин чиқинди ташланади ва улар қайта ишланмайди.
Хорижий энергияга қарамликни камайтириш учун уларни синтетик газга айлантиришимиз мумкин. Ҳар бири йилига 600 минг тоннани қайта ишлашга қодир ўнта завод беш йил давомида бутун Италия тармоғини иситиш ва қувват билан таъминлаш учун зарур бўлган газнинг 10 фоизини таъминлай олади, — деди у.
Италия 2024—2025 йиллар қишигача Россия газидан бутунлай мустақил бўлишни ният қилган.
Июль ойи охирида Италиянинг Эни нефть ва газ компанияси бошқа етказиб берувчилар билан шартномалар орқали 2025 йилгача Россия газидан тўлиқ воз кечмоқчилигини эълон қилди.
Компания аллақачон Жазоир, Миср ва Конго билан газ етказиб бериш бўйича шартномалар тузган.
Бундан ташқари, Ливия, Ангола ва Мозамбик билан шартномалар тузиш имконияти кўриб чиқилмоқда.
Эни маълумотларига кўра, 2025 йилга бориб 20 млрд куб метргача бўлган муқобил газ етказиб беришга эришиш ҳақиқатда Россия газининг йиллик импортини 100 фоизини қоплайди.
Изоҳ (0)