«Пахтакор» матбуот хизмати «Сўғдиёна»га қарши ўйиндан кейин расмий саҳифаларда билдирган фикрлари учун жаримага тортилади

ПФЛ бош директори Диёр Имомхўжаев «Пахтакор» ва «Сўғдиёна» ўртасидаги баҳсдан сўнг (2:2) юзага келган муҳокамаларга ўз муносабатини билдирди.

Суперлига доирасида кечган ўйиндан кейин клуб матбуот хизмати ижтимоий тармоқлардаги расмий саҳифаларда учрашувдаги ҳакамлик борасида кескин фикр билдирган.

Диёр Имомхўжаев «шерлар» матбуот хизмати ўз саҳифасида баён қилган фикрлари учун жаримага тортилишини маълум қилди. Шунингдек, ПФЛ директори бунгача ҳам клуб матбуот матбуот котибининг иши икки марта Тартиб-интизом қўмитасида кўриб чиқилгани ҳам бунга асос бўлишини таъкидлаган.

«‘Пахтакор’ матбуот хизмати 14 та клуб орасида энг яхшиси. Аммо бу ҳолат уларга этика нормаларидан четга чиқиш ваколатини бермайди», — дейди Диёр Имомхўжаев.

Эслатиб ўтамиз, Суперлига қолдирилган 11-тур ўйинининг 52-дақиқасида ҳакам «Пахтакор» футболчиси Одил Ҳамробековга қизил карточка кўрсатиб, майдондан четлатди. Ўйин охирида эса «шерлар» футболчиси ўз жарима майдонида қўл билан ўйнади деб топди ва VAR’га мурожаат қилди. Натижада тошкентликлар дарвозаси томон пенальти белгиланди. «Сўғдиёна» ушбу стандарт вазиятни голга айлантириб, дуранг натижага эришди.