Ёшлар ўртасида содир бўлаётган ҳуқуқбузарликлар, уларга нисбатан қўлланиладиган тазйиқ ва зўравонликларнинг олдини олиш долзарблигича қолмоқда. Бу ҳақда 5 август куни парламент юқори палатаси ялпи мажлисида Сенат раиси Танзила Норбоева тўхталиб ўтди, дея хабар бермоқда «Дарё» мухбири.
Танзила Норбоеванинг айтишича, муаммони ечишнинг асосий йўли жазолаш эмас, профилактикадир.
Масъул вазирлик ва идоралар вакиллари эътиборини бир жиҳатга қаратмоқчиман. Мана ҳозир айтиб ўтилдики, ёшлар ўртасидаги ҳуқуқбузарликлар, ўз жонига қасд қилиш, ёшларга нисбатан тазйиқ ва зўравонлик қўлланилиши – булар ижтимоий тармоқларда чиқяпти, уларни ўқиб, «ичимиз оғрияпти». Чунки ёшлар келажагимиз. Бундай ҳолатлар бўлмаслиги учун Ички ишлар вазирлиги Мактабгача таълим, Олий ва ўрта махсус таълим, Халқ таълими вазирликларининг ҳар бири билан алоҳида чора-тадбирларни ишлаб чиқиб, биргаликда доимий равишда ишлаши керак.Аввалроқ Сенат раиси ҳимоя ордери талабларига риоя этмаган, аёлларга зўравонлик қилган, тазйиқ ўтказадиган шахсларга нисбатан жарима миқдорини ошириш нотўғри эканини таъкидлаганди. Танзила Норбоевага кўра, жарима кўтарилиши аёлнинг ўзига ҳам оғир юк бўлиши ва тазйиқлар яна давом этиши мумкин.Тенденциялар нимадан иборат бўляпти? Жиноятчиликни қайд қилиб, жиноятга қўл урганларга жазо чорасини қўллаш асосий иш эмас, асосий ишимиз – профилактика. Ёшлар ўртасида ҳуқуқбузарликлар содир этилишига нима сабаб бўляпти? Олдини олиш чораларини вазирликлар билан биргаликда кўриб чиқиш керак бўлади. Бундан ташқари, соғлиқни сақлаш муассасалари ҳисобида турган шахсларнинг 93 фоизи, гиёҳвандларнинг 96 фоизи мажбурий даволанишга юборилмаган бўлса, спиртли ичимликка ружу қўйганларнинг атиги 4,1 фоизи, диспансер ҳисобидаги тажовузкор руҳий касалларнинг 52 фоизи мажбурий даволанишга юборилган, холос. Қолганлари маҳаллада ва бошқа жойларда бемалол яшаб турибди ва маҳаллага, жамиятга ўз зарарини келтириб юрибди. Бу жуда жиддий муаммо. Аввало, уларнинг ҳаёти, соғлиғи учун муҳим. Улар ҳам инсон – бизнинг ватандошимиз. Уларни ҳам ўйлашимиз керак. Ҳаётда қийналмаслиги, ўз йўлини топиб олиши учун чоралар кўрилиши керак. Бошқа жиҳатдан қараганда, агар ўз вақтида чоралар кўрилмаса, атрофидагилар, биринчи навбатда, оила аъзолари зиён кўриши мумкин.
Шу боис Қутбидин Нукритдиновичга (Сенат қўмитаси раиси–таҳр.) топшириқ бермоқчиман. Ички ишлар вазирлиги, Маҳалла ва нуронийларни қўллаб-қувватлаш вазирлиги, Оила ва хотин-қизлар давлат қўмитаси ҳамда Соғлиқни сақлаш вазирлиги билан биргаликда тиббиёт муассасалари ҳисобида турган шахсларни мажбурий даволашга юбориш борасида юзага келаётган муаммолар бўйича таҳлил ўтказсангиз-да, аниқланган муаммоларнинг ечими юзасидан асослантирилган таклифларни ишлаб чиқиб, масалани қўмита мажлисида алоҳида кўриб чиқишингизни сўраймиз. Вазирликларни битта жойга йиғиб, масалани ўрганинг. Масалан, ҳозир Пўлат Раззақович (Ички ишлар вазири–таҳр.) наркология диспансери тўғрисида айтди. Мажбурий даволаш чоралари кўрилаётганлиги айтилди. Лекин яна нима қилиш керак? Эркинликда юриб, бемалол мана шунақа ишларни қилаверади. Тўғрими? Нима қилсак бўлади? Шунинг учун қўмитамиз мувофиқлаштирувчи бўлса-да, вазирликлар билан бирга таҳлил ўтказиб, таклифларни ишлаб чиқиб, бизга ахборот берсангиз.
Танзила Норбоева, Сенат раиси
Изоҳ (0)