Андижон вилояти ҳокими Шуҳрат Абдураҳмонов футбол бўйича ўтказилган ДХХ кубоги вилоят босқичи ғолиб жамоасининг ҳар бир ўйинчисига 10 миллион сўмдан пул мукофоти берди. Бу ҳақда «Дарё»га вилоят ҳокимлиги ахборот хизмати хабар берди.
Маълум қилинишича, Андижон давлат тиббиёт институтида ДХХ кубогининг вилоят босқичида Асака туманининг «Юксалиш» маҳалласи жамоасини 2:1 ҳисобида мағлуб қилган Андижон туманининг «Полосон» маҳалласи жамоаси тақдирланган.
Унда иштирок этган вилоят ҳокимининг ёшлар сиёсати, ижтимоий ривожлантириш ва маънавий-маърифий масалалар бўйича ўринбосари Насибилло Мўминов вилоят ҳокимининг ташаббусига асосан ғолиб жамоа ўйинчиларининг ҳар бири — 21 нафар киши 10 миллион сўмдан мукофот пуллари билан рағбатлантирилганлигини маълум қилган.
Аввалроқ мусобақа ғолибларини тақдирлаш маросимида иштирок этган вилоят ҳокими Шуҳрат Абдураҳмонов иккинчи ўринни олган Асака тумани ёшларининг кўрсатган ўйини эътироф этиб, уларнинг маҳалласида спорт майдони қуриб беришни ваъда қилгани ҳақида хабар берилганди.
Изоҳ (0)