21 июль куни Ўзбекистонга иш сафари доирасида Plug&Play Германй бошқарувчи директори Саша Каримпур ва корпоратив ҳамкорлик бўйича менежери Феликс Ламмерс Алоқа банк бошқаруви раиси маслаҳатчиси Олимжон Умаров, Алоқа Ventures директори Сухроб Гайбуллоев ва IT Park лойиҳа менежери Зайнаб Атабаева билан учрашди. Бу ҳақда IT-парк матбуот хизмати хабар берди.
Учрашувда томонлар Ўзбекистонда Plug&Play офисини очиш бўйича ҳамкорлик масалаларини муҳокама қилди. Хорижий ҳамкорларнинг таъкидлашича, Ўзбекистондаги ваколатхона венчур капитални жалб қилишда, ўсишда ва йирик корпорациялар билан боғланишда ёрдам берадиган стартапларни танлаб олади.
Учрашув томонлари Ўзбекистонда бундай ноёб экотизимнинг яратилиши ёш стартаплар учун «яккашохлар» даражасига етган лойиҳаларга эга бўлишлари учун қўшимча имконият бўлишини таъкидлади.
2022 йилнинг 2 май куни IT Park директори Фарҳод Ибрагимов Германиянинг Штутгарт шаҳридаги Plug&Play офисларидан бирига ташриф буюриб, у ерда Plug&Play EМЕА’нинг ҳамраиси Сина Амиди, Саша Каримпур ва Феликс Ламмерс билан учрашди.
Учрашув давомида томонлар янги платформа очиш масаласини муҳокама қилишди. Натижада режалар тасдиқланди ва такомиллаштирилди, энди эса Plug&Play компанияси Тошкентда расман ўз ваколатхонасини очмоқда.
Янги жойлашув маҳаллий корпорациялар ва агентликлар учун стартаплар билан яқиндан ҳамкорлик қилиш учун кўпроқ имкониятлар яратишга ёрдам беради, қолаверса, минтақада стартап экотизимини ривожлантиришни жадаллаштиришга ёрдам беради.
Plug&Play билан ҳамкорлик, шунингдек, стартапларга халқаро бозорга киришга ёрдам беради, чунки улар бутун дунё бўйлаб 40 дан ортиқ жойлардан иборат глобал тармоққа кириш имкониятига эга бўлади.
Plug&Play – бу стартаплар, корпорациялар, венчур капитал фирмалари, университетлар ва давлат идораларини бирлаштирадиган етакчи инновацион платформа. Компания бешта қитъада 40 дан ортиқ жойда фаолият юритади ва штаб-квартираси Силикон водийсида жойлашган.
Изоҳ (0)