19 июль куни Тошкентда янги «GAP» — IT соҳада аёллар клуби лойиҳаси ишга туширилди. Бу ҳақда IT Park хабар бермоқда.
Ушбу лойиҳанинг мақсади — аёлларни ахборот технологиялари соҳасига жалб қилиш.
Клубнинг асосий вазифаси – аёлларни қўллаб-қувватлаш, уларнинг IT соҳасидаги саводхонлигини ошириш ҳамда уларни IT соҳасида ўқитиш ва ишга жойлаштириш имкониятини яратишдан иборат.
Клуб ташаббускорларининг мақсади — IT-соҳасида аёлларнинг танқислиги муаммосини ҳал қилиш, IT касбларини аёллар ва ёш қизлар учун очиқ ва қизиқарли қилиш, шу орқали IT соҳасидаги гендер тафовутини камайтиришдан иборат.
Клубда мунтазам равишда расмий ва норасмий тадбирлар ўтказилади:
- Расмий — спикерларнинг чиқишлари, тақдимотлар, муҳокамалар. Бунинг учун клуб ўз ғояларини муваффақиятли лойиҳаларга айлантирган аёлларни меҳмон сифатида таклиф қилади.
- Норасмий — дастур ҳар сафар янгиланади: бу фильмларни томоша қилиш, квест ёки спорт тадбирлари бўлиши мумкин.
Клубда иштирок этиш аёлларга катта афзалликлар тақдим этади. Масалан, аёлларни АКТ соҳасида ўқитиш ва ривожлантириш келажакда уларга юқори маошли иш топиш имконини беради.
Бу, айниқса, ўзларига қулай жадвалда ишлашни орзу қилган аёллар ва фрилансерлар учун актуал. Бундан ташқари, бу ҳар бир аёлнинг ўз пулига эга бўлишига ва молиявий жиҳатдан мустақил бўлишига имкон беради.
Келгусида клубни аёллар учун мулоқот майдонига айлантириш режалаштирилган, унда иштирокчилар ўзаро фикр алмашишлари, нетворкингни кучайтиришлари ва ўзаро ҳамкорлик қилиш учун ҳамфикрларни топишлари мумкин.
Аввалроқ қизлар учун Skills4Girls тренинг дастури ишга туширилгани ҳақида хабар берилганди.
Изоҳ (0)