Plug and Play O‘zbekiston startaplariga xalqaro darajaga chiqishga yordam beradi

21-iyul kuni O‘zbekistonga ish safari doirasida Plug&Play Germany boshqaruvchi direktori Sasha Karimpur va korporativ hamkorlik bo‘yicha menejeri Feliks Lammers Aloqa bank boshqaruvi raisi maslahatchisi Olimjon Umarov, Aloqa Ventures direktori Suxrob Gaybulloyev va  IT Park loyiha menejeri Zaynab Atabayeva bilan uchrashdi. Bu haqda IT-park matbuot xizmati xabar berdi.

Uchrashuvda tomonlar O‘zbekistonda Plug&Play ofisini ochish bo‘yicha hamkorlik masalalarini muhokama qildi.  Xorijiy hamkorlarning ta’kidlashicha, O‘zbekistondagi vakolatxona venchur kapitalni jalb qilishda, o‘sishda va yirik korporatsiyalar bilan bog‘lanishda yordam beradigan startaplarni tanlab oladi.

Uchrashuv tomonlari O‘zbekistonda bunday noyob ekotizimning yaratilishi yosh startaplar uchun “yakkashoxlar” darajasiga yetgan loyihalarga ega bo‘lishlari uchun qo‘shimcha imkoniyat bo‘lishini ta’kidladi.

2022-yilning 2-may kuni IT Park direktori Farhod Ibragimov Germaniyaning Shtutgart shahridagi Plug&Play ofislaridan biriga tashrif buyurib, u yerda Plug&Play EMEA’ning hamraisi Sina Amidi, Sasha Karimpur va Feliks Lammers bilan uchrashdi.

Uchrashuv davomida tomonlar yangi platforma ochish masalasini muhokama qilishdi. Natijada rejalar tasdiqlandi va takomillashtirildi, endi esa Plug&Play kompaniyasi Toshkentda rasman o‘z vakolatxonasini ochmoqda.

Yangi joylashuv mahalliy korporatsiyalar va agentliklar uchun startaplar bilan yaqindan hamkorlik qilish uchun ko‘proq imkoniyatlar yaratishga yordam beradi, qolaversa, mintaqada startap ekotizimini rivojlantirishni jadallashtirishga yordam beradi.

Plug&Play bilan hamkorlik, shuningdek, startaplarga xalqaro bozorga kirishga yordam beradi, chunki ular butun dunyo bo‘ylab 40 dan ortiq joylardan iborat global tarmoqqa kirish imkoniyatiga ega bo‘ladi.

Plug&Play – bu startaplar, korporatsiyalar, venchur kapital firmalari, universitetlar va davlat idoralarini birlashtiradigan yetakchi innovatsion platforma. Kompaniya beshta qit’ada 40 dan ortiq joyda faoliyat yuritadi va shtab-kvartirasi Silikon vodiysida joylashgan.