Гуруч глобал озиқ-овқат таъминоти учун навбатдаги муаммо бўлиши мумкин. Бу ҳақда Bloomberg хабар бермоқда.
Бунга сабаб эса дунёдаги энг йирик экспортчи Ҳиндистоннинг баъзи ҳудудларида ёмғир танқислиги фойдали ер майдонлари 3 йил ичидаги рекорд даражада қисқартиргани бўлди.
Жорий мавсумда жами гуруч экиладиган майдон 13 фоизга камайди, чунки баъзи ҳудудларда — Ҳиндистоннинг тўртдан бир қисмини ташкил этувчи Ғарбий Бенгалия ва Уттар-Прадешда деярли ёғингарчилик кузатилмаяпти.
Савдогарлар гуруч ишлаб чиқариш ҳажмининг пасайиши Ҳиндистоннинг инфляцияга қарши курашини мураккаблаштириши ва экспортга чекловлар қўйишидан хавотирда. Бу ҳолат миллиардлаб одамлар учун жуда ёмон оқибатларга олиб келади.
Глобал гуруч савдосининг 40 фоизи Ҳиндистон томонидан амалга оширилади. Ҳукумат эса озиқ-овқат хавфсизлигини таъминлаш ва маҳаллий нархларни назорат қилиш учун буғдой ва шакар экспортини чеклаб қўйган.
Ғарбий Бенгалия, Одиша ва Чхаттисгарх каби йирик ўсаётган штатларда сўнгги икки ҳафта ичида ёғингарчилик камлиги ва Бангладешдан талабнинг ортиши туфайли баъзи навларнинг нархи 10 фоиздан ошди, — деди Спонге Enterpriseс директори Мукеш Жейн.
Унинг сўзларига кўра, экспорт нархлари сентябрь ойига қадар бир тонна учун 400 долларгача кўтарилиши мумкин, ҳозирда қиймат — 365 доллар.
Дунёдаги гуручнинг катта қисми Осиёда етиштирилади ва истеъмол қилинади, шу сабабли у минтақадаги сиёсий ва иқтисодий барқарорлик учун муҳим.
Украинада уруш бошлангандан сўнг буғдой ва маккажўхори нархининг кўтарилишидан фарқли ўлароқ, гуруч қиймати мўл ишлаб чиқариш ва заҳиралар туфайли пасайиб кетди. Бу эса озиқ-овқат инқирозининг олдини олишга ёрдам берди.
Nomura Holdings иқтисодчиси Сонал Варманинг сўзларига кўра, агар ёғингарчиликдаги географик номутаносибликлар сақланиб қолса, бу маҳсулот ишлаб чиқаришга, иқтисодий ўсиш ва инфляцияга салбий таъсир кўрсатиши мумкин.
Аввалроқ буғдой нархи ортидан Осиё гуручининг ҳам нархи кўтарилаётгани ҳақида хабар берилганди.
Изоҳ (0)