Global ta’minotga bosim: Hindistonda guruch hosili xavf ostida

Guruch global oziq-ovqat ta’minoti uchun navbatdagi muammo bo‘lishi mumkin. Bu haqda Bloomberg xabar bermoqda.

Bunga sabab esa dunyodagi eng yirik eksportchi Hindistonning ba’zi hududlarida yomg‘ir tanqisligi foydali yer maydonlari 3 yil ichidagi rekord darajada qisqartirgani bo‘ldi.

Joriy mavsumda jami guruch ekiladigan maydon 13 foizga kamaydi, chunki ba’zi hududlarda — Hindistonning to‘rtdan bir qismini tashkil etuvchi G‘arbiy Bengaliya va Uttar-Pradeshda deyarli yog‘ingarchilik kuzatilmayapti.

Savdogarlar guruch ishlab chiqarish hajmining pasayishi Hindistonning inflyatsiyaga qarshi kurashini murakkablashtirishi va eksportga cheklovlar qo‘yishidan xavotirda. Bu holat milliardlab odamlar uchun juda yomon oqibatlarga olib keladi.

Global guruch savdosining 40 foizi Hindiston tomonidan amalga oshiriladi. Hukumat esa oziq-ovqat xavfsizligini ta’minlash va mahalliy narxlarni nazorat qilish uchun bug‘doy va shakar eksportini cheklab qo‘ygan.

G‘arbiy Bengaliya, Odisha va Chxattisgarx kabi yirik o‘sayotgan shtatlarda so‘nggi ikki hafta ichida yog‘ingarchilik kamligi va Bangladeshdan talabning ortishi tufayli ba’zi navlarning narxi 10 foizdan oshdi, — dedi Sponge Enterprises direktori Mukesh Jeyn.

Uning so‘zlariga ko‘ra, eksport narxlari sentabr oyiga qadar bir tonna uchun 400 dollargacha ko‘tarilishi mumkin, hozirda qiymat — 365 dollar.

Dunyodagi guruchning katta qismi Osiyoda yetishtiriladi va iste’mol qilinadi, shu sababli u mintaqadagi siyosiy va iqtisodiy barqarorlik uchun muhim.

Ukrainada urush boshlangandan so‘ng bug‘doy va makkajo‘xori narxining ko‘tarilishidan farqli o‘laroq, guruch qiymati mo‘l ishlab chiqarish va zahiralar tufayli pasayib ketdi. Bu esa oziq-ovqat inqirozining oldini olishga yordam berdi.

Nomura Holdings iqtisodchisi Sonal Varmaning so‘zlariga ko‘ra, agar yog‘ingarchilikdagi geografik nomutanosibliklar saqlanib qolsa, bu mahsulot ishlab chiqarishga, iqtisodiy o‘sish va inflyatsiyaga salbiy ta’sir ko‘rsatishi mumkin.

Avvalroq bug‘doy narxi ortidan Osiyo guruchining ham narxi ko‘tarilayotgani haqida xabar berilgandi.